Acts 28
1 𠊎等平安上岸以後，正知該島安到馬耳他。
2 住在島上个人對𠊎等盡熱情。因為該時落雨，天氣又冷，佢等就起火來接待𠊎等。
3 保羅拈一把柴，放在火底背。有一尾毒蛇，因為盡燒就鑽出來，纏等佢个手。
4 島上个人看到該尾蛇吊在保羅个手項，就彼此講：「這人一定係兇手，雖然對海底背得救上來，天理還係毋准佢生。」
5 總係保羅將該尾蛇拂落火底背去，並無受傷害。
6 大家等等佢个手腫起來，抑係忽然橫落去死掉；總係等盡久，看佢平安無事，就改變想法，講：「佢係神明！」
7 離該地方無幾遠，酋長部百流有兜田產。佢歡迎𠊎等，誠心款待𠊎等三日。
8 該時，部百流个阿爸熱到又屙痢肚，睡在眠床。保羅去佢个房間，為佢祈禱，按手，醫好佢。
9 因為恁樣，島上所有个病人就攏總來，全部也得到醫好。
10 佢等送𠊎等盡多禮物；到開船个時，又將𠊎等路上所需要个東西送到船頂。
11 過三個月，𠊎等坐上一隻對亞歷山大來个船；這隻船用「宙斯个雙胞胎」做記號，係停在該海島過冬个。
12 船到敘拉古，𠊎等在該位停跎三日，
13 然後又開船，到利基翁。第二日有南風，所以兩日內就到部丟利，
14 在該位堵到一兜兄弟姊妹；佢等請𠊎等停留一禮拜。然後，𠊎等就去羅馬。
15 羅馬个兄弟姊妹聽到𠊎等到个消息，就到亞比烏市㧯三館來迎接𠊎等。保羅一看到佢等就感謝上帝，更加得到勇氣。
16 𠊎等到羅馬以後，保羅得到許可，㧯該看守佢个兵仔住在另外一個所在。
17 過三日，保羅請當地猶太人个領袖來相見。佢等來到，保羅對佢等講：「各位兄弟啊，雖然𠊎無做麼介事來得罪同胞，抑係違背祖先个規矩，無想到𠊎卻在耶路撒冷被人捉來關，又押送去交給羅馬當局。
18 佢等審問𠊎，總係尋毋到𠊎有麼介該死个罪，想愛放𠊎。
19 總係猶太人反對，迫到無辦法，𠊎只有上訴皇帝，並毋係𠊎愛告同胞麼介。
20 為到這個緣故，𠊎要求同你等見面講話。𠊎所以帶等這鎖鍊，原來係為到以色列人所盼望个該儕。」
21 佢等對保羅講：「關係你个事，𠊎等無對猶太接到麼介信仔，也無兄弟對該位帶麼介消息來，乜無講你麼介壞話。
22 總係，𠊎等想愛聽你親口講你个看法，因為𠊎等知你所屬个教派係在逐所在受人攻擊个。」
23 所以，佢等㧯保羅約定日仔來聚會。該日有盡多人來保羅住个所在；從早到暗，佢對佢等講解上帝國个道理，並引證摩西个法律㧯先知書，勸佢等信耶穌。
24 有兜人信佢所講个，有兜人毋信。
25 彼此意見毋合，佢等就散會。吂散開以前，保羅講一句話，講：「聖靈通過先知以賽亞對你等祖先所講个無毋著！
26 你去㧯這個子民講：你等聽了又聽，總係毋會入耳；看了又看，總係毋會了解。
27 因為這子民个心盡鈍；佢等又耳公背背，目珠眨眨。若毋係恁樣，佢等个目珠會看得到，耳公會聽得入耳，心也會明白，佢等就會回心轉意，𠊎就會醫好佢等。」
28 保羅結論講：「所以，你等應當知，上帝拯救个道理已經傳給外邦人；佢等反轉會聽！」
30 保羅在自家所稅來个屋住兩年。所有來訪問个人，佢攏總接待。
31 佢大膽宣傳上帝國个道理，將關係主耶穌基督个事情教示人，無受到麼介阻礙。