Acts 26
1 亞基帕王對保羅講：「准你為自家辯護。」保羅就伸手，為自家辯護。
2 佢講：「亞基帕王啊，𠊎今晡日有好在你面前，為猶太人告𠊎个一切事來辯護，感覺實在萬幸！
3 特別係你盡熟猶太人个規矩㧯所爭論个問題。所以，𠊎求你耐心聽𠊎个申訴。
4 「𠊎從細到這下个做人係樣般，猶太人全部知，因為𠊎一直生活在本國人民个中間，後來也識住在耶路撒冷。
5 若係佢等肯做證，佢等最清楚，𠊎一開始就係屬𠊎等宗教中最嚴格个宗派，做一個法利賽人。
6 這下𠊎企在這位受審判，係因為盼望上帝對𠊎等祖先所應許个。
7 這應許係𠊎等十二支族个同胞日夜熱心敬拜上帝，所盼望愛得到个。王啊，就係因為這個盼望，猶太人正告𠊎！
8 你等樣會想上帝使死人復活係無可能个事呢？
9 「𠊎頭擺也認為應該盡力反對拿撒勒人耶穌个名。
10 𠊎在耶路撒冷就係恁樣做。𠊎對祭司長領受權柄，將多多个聖徒捉來關；毋單淨恁樣，𠊎也贊成佢等被人判死刑。
11 另外，𠊎在各會堂也多多擺刑罰佢等，強迫佢等放掉信仰。𠊎非常惱佢等，甚至去外國个城市迫害佢等。
12 「有一擺，𠊎帶等祭司長給𠊎个權柄㧯命令去大馬士革。
13 王啊，當晝个時，𠊎在路上看到大光，比日頭个光還較強，對天頂照在𠊎㧯共下去个人周圍。
14 𠊎等攏總橫落地上。𠊎聽到一個聲，用希伯來話對𠊎講：『掃羅，掃羅！你做麼介迫害𠊎？你只有傷害自家，像牛用腳掉主人有竻仔个棍仔一樣。』
15 𠊎問講：『主啊，你係麼人？』主講：『𠊎就係你所迫害个耶穌。
16 䟘起來，企等！𠊎對你顯現係愛設立你做𠊎个僕人，派你去為到今晡日你看到𠊎个事㧯將來𠊎愛指示你个事做見證。
17 𠊎會將你對以色列人㧯外邦人手中救出來。𠊎差派你去佢等中間，
18 來開佢等个目珠，使佢等對烏暗中轉向光明，對撒但个權勢之下歸向上帝；恁樣，佢等就會因為信𠊎來得到赦罪，也會在上帝个選民中得到地位。』
19 「所以，亞基帕王啊，𠊎無違背對天頂來个異象。
20 𠊎先在大馬士革㧯耶路撒冷，然後在全猶太㧯外邦人中間勸佢等悔改，歸向上帝，行事為人愛合佢等悔改个心志。
21 就係為到恁樣，𠊎在聖殿底背个時，猶太人就捉𠊎，想愛㓾𠊎。
22 總係，直到今晡日，得到上帝个幫助，𠊎還企在這位，對所有个人做見證，無論佢等係尊貴抑係卑微个。𠊎所講个就係先知㧯摩西所講愛發生个事，
23 就係基督定著會受害，又會最先對死復活，向猶太人㧯外邦人宣佈拯救个光已經來到。」
24 因為保羅个申訴恁樣講，非斯都就大聲對佢講：「保羅，你發癲了！你个學問忒大，卻害你發癲了！」
25 保羅講：「非斯都大人！𠊎無發癲；𠊎所講个話係真實又合理个。
26 亞基帕王也清楚這兜事情，所以𠊎正對王大膽直講。𠊎相信這兜事情，無一件係王毋知个，因為毋係在暗中發生个。
27 亞基帕王啊，你相信先知麼？𠊎知你相信！」
28 亞基帕王對保羅講：「你恅到勸𠊎一下仔，𠊎就會變做基督徒係麼？」
29 保羅講：「無論勸多勸少，𠊎對上帝所求个，就係你㧯所有今晡日在場聽𠊎講話个人，全部會變做㧯𠊎共樣，總係莫像𠊎有這兜鎖鍊！」
30 王、總督、百妮基，㧯其他个人就企起來。
31 佢等行出去以後，彼此講：「這個人並無犯麼介該死抑係愛關个罪。」
32 亞基帕對非斯都講：「這個人若係無對皇帝上訴，就做得放佢走。」