Acts 19
1 亞波羅在哥林多个時，保羅旅行經過內地來到以弗所。在該位，佢堵到一兜信徒，
2 就問佢等講：「你等信主个時，有領受聖靈無？」佢等應講：「無，連麼介係聖靈𠊎等也毋識聽過。」
3 保羅又問：「恁樣，你等所領个係麼介洗禮？」佢等講：「係約翰个洗禮。」
4 保羅講：「約翰个洗禮係為該兜悔改个人行个；佢㧯以色列人講，愛信該在佢以後愛來个，就係耶穌。」
5 佢等一聽到這個話，就奉主耶穌个名領洗禮。
6 保羅為佢等按手，聖靈降在佢等身上；佢等就講屬靈个語言，又宣佈上帝个話。
7 佢等一共約有十二個人。
8 連等三隻月，保羅照常去到會堂，大膽講道，㧯人辯論上帝國个事，勸人相信。
9 佢等中間有兜人硬頸毋肯信，在會眾面前譭謗主个道。所以保羅帶等信徒離開佢等，逐日在推喇奴講堂㧯人討論。
10 恁樣繼續工作兩年久，所以住在亞細亞省个人，無論猶太人抑係外邦人，全部聽過主个道理。
11 上帝通過保羅行一兜非常希奇个神蹟；
12 甚至有人拿佢用過个手巾抑係圍身裙去放在病人个身上，也會使病痛消除，使邪靈對所附身个人身上出來。
13 有兜逐所在去作法逐鬼个猶太人也想愛借主耶穌个名來行這個事。佢等對邪靈講：「𠊎奉保羅所傳个耶穌个名，命令你等出來。」
14 行這事个人係猶太祭司長士基瓦个七個孻仔。
15 總係，邪靈應佢等講：「𠊎識耶穌，保羅𠊎也知；總係，你等係麼人？」
16 該被邪靈附身个人就跳到佢等个身上來制伏佢等。佢等攏總受傷，赤身露體，對該屋肚逃走出去。
17 所有住在以弗所个猶太人㧯外邦人聽到這件事，全部盡著驚；主耶穌个名對該時更加受人尊重。
18 有盡多信徒就將佢等頭擺做過个事公開承認出來。
19 盡多行邪術个人帶佢等个書來，堆做一堆，當眾放火燒。佢等算這兜書个價錢，總共大約五萬隻銀錢。
20 因為這兜事，主个道理滿遍傳開，日日興旺。
21 這兜事情過掉，保羅決定愛經過馬其頓㧯亞該亞去耶路撒冷。佢講：「到該位以後，𠊎也一定愛去羅馬訪問。」
22 所以佢派佢兩個助手提摩太㧯以拉都去馬其頓；佢自家暫時留在亞細亞省。
23 就在該時，因為主个道，以弗所發生一件嚴重个動亂。
24 有一個名安到底米丟个銀匠，佢係用銀製造亞底米女神廟模型个人；這種頭路使盡多師傅大賺錢。
25 底米丟召集這兜工人㧯所有个同業，對佢等講：「各位，你等知𠊎等係靠這頭路賺錢个。
26 這下，你等看到也聽到這隻保羅在該位做麼介。佢講：『人手所做个神像毋係神明！』佢已經害盡多在以弗所㧯差毋多全亞細亞省个人受迷惑。
27 照恁樣看，𠊎等个頭路會有被人看輕个危險。毋單淨恁樣，連大女神亞底米个廟也會被人藐視，在亞細亞省㧯普天下受人敬拜个女神个尊榮也會受到破壞！」
28 眾人一聽到這兜話就非常譴，大聲喊講：「以弗所人个亞底米係最偉大个！」
29 對恁樣，暴動遰到全城。暴民捉到跈保羅共下來个馬其頓人該猶㧯亞里達古，拉等佢兩儕撞入戲院肚。
30 保羅想愛去眾人个頭前，總係該兜信徒毋俾佢入去。
31 還有亞細亞省个幾個領袖，係保羅个朋友，也喊人去勸保羅，毋好冒險入去戲院肚。
32 這時，全場亂吵吵，有兜喊東，有兜喊西，大部份毋知佢等係為麼介來該位聚集。
33 猶太人將亞歷山大㩳到頭前去，有兜人就認為佢應該為這件事負責任。亞歷山大比手勢，愛對眾人講話來申訴。
34 總係，大家一認出佢係猶太人，就同聲盡喊講：「以弗所人个亞底米係最偉大个！」恁樣緊喊大約有兩點鐘久。
35 最後，該城肚个書記官正使眾人恬下來。佢講：「以弗所人啊！麼人毋知以弗所城係看守大亞底米女神廟㧯該隻對天頂降下來个聖石呢！
36 既然無人能否認這兜事，你等就應該恬恬，毋好亂來。
37 你等將這兜人帶到這位來，總係，佢等並無偷廟底背个東西，也無褻瀆𠊎等个女神。
38 若係底米丟㧯佢个同業愛告麼人，自有規定開庭个日仔㧯聽訟个官長，佢等做得去對質。
39 若係有其他个事，也做得在合法个會議中解決。
40 像今晡日个暴動，𠊎等難免會被人追究責任。這一切个擾亂係毋著个，𠊎等自家也講毋出麼介理由。」
41 講這兜話以後，佢就喊眾人散會。