1最後，兄弟姊妹啊，請為𠊎等祈禱，好俾主个真道遽遽傳開，也得到尊重，像傳到你等當中也受尊重一樣。
2請你等也愛祈禱上帝，救𠊎等脫離該兜邪惡个人，因為毋係每一個人都相信真道。
3總係，主係信實个；佢會使你等成做堅強，又保護你等脫離該邪惡者个陷害。
4𠊎等靠主確信，你等當在該位實行𠊎等所吩咐个，也會一直實行下去。
5願主帶領你等，使你等較深體驗上帝个痛惜，也有基督所賜个耐心。
6兄弟姊妹啊，𠊎等奉主耶穌基督个名命令你等：愛遠遠離開所有懶尸毋盡本份、毋照𠊎等教訓去行个信徒。
7你等自家清楚知，應該樣般效法𠊎等。𠊎等同你等共下个時，盡本份，毋識懶尸，
8也無白食麼人个飯；反轉辛苦勞碌，日夜做事，免得你等中間有人受拖累。
9𠊎等恁樣做，毋係𠊎等無權利要求生活个供給，係愛做榜樣給你等效法。
10𠊎等在你等該位个時，識吩咐你等講：「毋做事个人做毋得食飯。」
11𠊎等講這個話，係因為聽講你等當中有人懶尸毋盡本份，透日毋做事，反轉好管別人个閒事。
12這種人，𠊎等奉主耶穌基督个名警告佢等，命令佢等，愛恬恬，親手做事來維持自家个生活。
13總係，兄弟姊妹啊，你等愛繼續行善，毋好灰心。
14若有人毋肯服從𠊎等在這封信仔底背所吩咐个話，你等愛提防這種人，莫同佢共下，使佢感覺見笑。
15總係，毋好看佢做敵人；愛像對信徒恁樣來勸話佢。
16願賜平安个主，隨時用各種个方法，親自將平安賜給你等！願主㧯你等大家同在！
17𠊎—保羅親筆對你等請安。𠊎逐封信仔攏總恁樣簽名；𠊎个筆跡就係恁樣。
18願𠊎等个主耶穌基督賜恩典給你等大家！