1大衛个孻仔押沙龍有一個當靚个老妹，安到塔瑪。大衛另外一個孻仔暗嫩愛到姖。
2因為塔瑪還係一個童貞女，暗嫩想毋出有麼介機會親近姖，佢就思念到發病仔。
3暗嫩有一個朋友安到約拿達，係大衛个阿哥示米亞个孻仔。約拿達當狡猾；
4佢問暗嫩講：「王子啊，你做麼介一日比一日無元氣？你做得㧯𠊎講麼？」暗嫩應講：「𠊎愛到塔瑪—𠊎共爺無共𡟓个兄弟押沙龍个老妹。」
5約拿達對佢講：「你做得假發病仔，睡在眠床頂。若爸來看你个時，就要求佢：『請喊吾老妹塔瑪來照顧𠊎，在𠊎面前為𠊎焙幾垤餅仔，俾𠊎好看到姖，喊姖親手拿給𠊎食。』」
6所以暗嫩假發病仔，睡在眠床頂。大衛王去看佢；暗嫩對王講：「請喊吾老妹塔瑪來，俾姖在𠊎面前為𠊎焙幾垤餅仔，親手拿給𠊎食。」
7所以，大衛派人到王宮㧯塔瑪講：「你去若哥暗嫩个屋下，做兜東西給佢食！」
8塔瑪就去厥哥暗嫩屋下；暗嫩在眠床頂睡等。塔瑪拿兜麵，在暗嫩个面前做幾垤餅，然後拿去焙。
9塔瑪將焙好个餅對盤肚倒出來，交給佢，總係暗嫩毋食。暗嫩講：「喊大家行開！」所以大家就行開。
10暗嫩對塔瑪講：「將餅仔帶到𠊎眠床堘，親手飼𠊎。」塔瑪就將姖所做个餅仔帶過去厥哥暗嫩个眠床堘。
11塔瑪飼佢个時，佢揪等塔瑪，講：「老妹，來啊！㧯𠊎共下睡！」
12塔瑪講：「阿哥，做毋得！毋好迫𠊎做這見笑个事。在以色列中做毋得有這種事。你毋好恁戇！
13在人个面前，𠊎頭那還會擎得起麼？你在以色列人面前也會盡無面子。請去求王，佢一定會將𠊎嫁給你。」
14總係暗嫩毋聽；佢氣力比塔瑪大，就用暴力強姦姖。
15事後，暗嫩就非常惱塔瑪；佢惱塔瑪个程度比以前愛姖還較厲害。佢對塔瑪講：「䟘起來！出去！」
16塔瑪講：「𠊎毋出去！你恁樣逐𠊎走，所犯个罪比你先前犯个還較重！」總係暗嫩毋聽；
17佢喊服事自家个僕人來，對佢講：「將這女子逐走，將門鎖好！」
18該僕人就將塔瑪逐走，將門鎖好。塔瑪著等當時吂嫁人个公主常著个彩色外袍。
19姖拿火灰委在頭那頂，扯裂外袍，雙手揞等面，緊行緊噭。
20厥哥押沙龍看到，就問姖：「暗嫩欺負你係麼？老妹，毋好艱苦心。暗嫩係你共爺無共𡟓个阿哥，你毋好㧯人提起這件事。」塔瑪就孤孤單單住在厥哥押沙龍个屋下。
21大衛王聽到這事，就大發譴。
22押沙龍因為暗嫩侮辱厥老妹塔瑪，怨恨暗嫩極深，無愛㧯佢講話。
23兩年後，押沙龍在偎近以法蓮个巴力‧夏瑣請人剪羊毛；佢邀請所有个王子到該位去過節。
24押沙龍去見大衛王，講：「國王啊，𠊎已經請人剪羊毛了，請你㧯你个官員跈𠊎共下去過節。」
25王應講：「孻仔啊，毋使恁樣！若係𠊎等全部去，驚怕忒麻煩你了。」總係押沙龍再三邀請；王還係毋答應，單單為佢祝福。
26押沙龍講：「恁樣，請你至少俾吾哥暗嫩跈𠊎去。」王講：「樣使佢去呢？」
27總係押沙龍再三懇求，大衛就答應俾暗嫩㧯王其他个孻仔跈押沙龍共下去。押沙龍預備非常滂沛个筵席，就像王个筵席。
28吩咐部下講：「你等注意，看暗嫩啉酒醉，𠊎一命令，你等就出手㓾掉佢。毋使驚，所有後果𠊎負責。你等愛勇敢堅強去做！」
29部下就照押沙龍个指示㓾掉暗嫩。王其他个孻仔全部騎騾仔逃走。
30當佢等還在路上个時，有風聲傳到大衛該位講：「押沙龍㓾掉王所有个孻仔，一個乜無留！」
31王企起來，哀傷到扯裂自家个衫，睡在地上。王个官員也全部扯裂衫，企在塍頭。
32總係大衛厥哥示米亞个孻仔約拿達講：「吾主啊，你該兜孻仔並無死，只有暗嫩一儕被人㓾死。自從暗嫩侮辱押沙龍个老妹塔瑪以後，押沙龍就決定愛㓾佢。
33吾主吾王，請毋好相信該無確實个消息，講王个孻仔全部死掉；其實，只有暗嫩一儕被人㓾死。」
34押沙龍已經逃走了。就在該時，守衛个兵仔看到一群人對何羅念山頂个路下來，就將所看到个向王報告。
35約拿達對大衛王講：「看哪，王个孻仔全部來了，就像若僕人頭先所講个。」
36佢个話正講煞，王个孻仔就全部入來。佢等開聲大噭；王㧯佢个官員也全部悲傷大噭。
39總係佢傷心過掉，就當想念押沙龍。