1西底家反巴比倫王尼布甲尼撒，所以尼布甲尼撒帶領全軍來攻打耶路撒冷；該時係西底家在位第九年十月初十。佢等安營在城外，在城牆四周圍起土堆來攻城，
2一直包圍到西底家王在位第十一年。
3該年四月初九，因為城內飢荒非常嚴重，人民已經無東西好食，
4最尾，城牆被人攻破。雖然巴比倫軍隊還包圍城，該暗晡王㧯防守个軍隊也全部逃走。佢等對王宮花園無幾遠該條路，穿過兩座城牆中間个門，向約旦山壢方向逃走。
5總係巴比倫軍隊逐西底家王，在耶利哥附近个平原逐到佢。該時佢个軍隊全部離開佢，散掉去了。
6佢等捉到佢，將佢帶到尼布甲尼撒王該位去。該時尼布甲尼撒王在利比拉城，佢就在該位審判西底家。
7佢等在西底家眼前㓾掉佢該兜孻仔，然後將佢个兩隻目珠挖出來，又用銅鍊仔䌈等佢，將佢帶到巴比倫去。
8巴比倫王尼布甲尼撒个十九年五月初七，王个顧問兼侍衛長尼布撒拉旦來到耶路撒冷。
9佢放火將上主个聖殿、王宮㧯耶路撒冷所有个屋舍燒掉，連該兜大官个屋也燒淨淨。
10跈侍衛長來个部隊將耶路撒冷四周圍个城牆全部拆掉。
11然後，侍衛長尼布撒拉旦將留在城肚个人—該兜賸到有手藝个人㧯投降巴比倫个人全部捉到巴比倫去。
12總係佢將最窮苦个人留在猶大，喊佢等在葡萄園㧯田肚工作。
13巴比倫人敲碎上主聖殿肚个銅柱、銅盆座㧯銅海，將所有个銅帶到巴比倫去。
14佢等也將清潔祭壇用个鏟仔㧯裝灰个鑊仔、燭花剪刀、裝牲儀个血用个大碗、㧯禮拜用个各種銅器全部帶走。
15侍衛長將所有用金仔、銀仔做个各種用品，包含裝火炭个爐仔、細盆仔也全部帶走。
16其中有所羅門王為聖殿鑄造个銅器—兩支銅柱、一隻銅海㧯十隻銅盆座—這兜銅器多到無法度來秤。
17兩支銅柱係完全共樣个；逐支高八公尺，有一公尺三公寸高个銅个柱頭，周圍裝飾銅製个網仔㧯銅石榴。
18尼布撒拉旦侍衛長也捉走祭司長西萊雅、副祭司長西番亞，㧯三個掌門个。
19佢又在城肚捉走一個指揮官，五個留在城肚个王室顧問，一個專管軍隊文件个書記官，㧯六十個地方上重要个人物。
20尼布撒拉旦侍衛長將佢等帶到巴比倫王面前；該時，王在哈馬地區个利比拉。
21王就在該位打佢等，將佢等㓾死。恁樣，猶大人民被人捉走，離開本國。
22巴比倫王尼布甲尼撒設立亞希甘个孻仔、沙番个孫仔基大利做猶大總督，愛佢管理無被人捉去巴比倫个人。
23該兜無投降个猶大官員㧯士兵聽到這消息，就來到米斯巴見基大利。這兜官員有尼探雅个孻仔以實瑪利，加利亞个孻仔約哈難，尼陀法人單戶默个孻仔西萊雅，瑪迦人雅撒尼亞。
24基大利對佢等㧯佢等个士兵發誓講：「你等毋使驚巴比倫个官員。做你等住在這地，服事巴比倫王，一切就會平安順利。」
25總係，在該年七月，王室家族个尼探雅个孻仔、以利沙瑪个孫仔以實瑪利帶等十個人來到米斯巴，㓾掉基大利，也㓾掉㧯佢共下个猶大人㧯巴比倫人。
26所以，所有个人民，無論大細，連同該兜軍官共下離開，逃難到埃及去，因為佢等驚巴比倫人。
27以未‧米羅達做巴比倫王該年，佢放猶大王約雅斤出監獄。這事發生在約雅斤被人捉走以後个第三十七年十二月二十七日。
28以未‧米羅達也恩待約雅斤，俾佢个身份高過該兜被人捉到巴比倫去个其他國王。
29約雅斤脫掉犯人个衫，一生人㧯巴比倫王共桌食飯。
30佢還生个年日，王賜給佢逐日个生活費用。