1以色列王約哈斯个孻仔約華施在位第二年，約阿施个孻仔亞瑪謝做猶大王。
2佢二十五歲个時做王，在耶路撒冷統治二十九年。佢个阿姆約耶但係耶路撒冷人。
3亞瑪謝行上主看做著个事，總係佢並無做到像厥祖先大衛王恁好；佢學厥爸約阿施所做个定定，
4無拆掉山岡頂个神廟，人民還係在該位獻祭燒香。
5亞瑪謝一堅固政權，就㓾掉該兜暗殺厥爸个官員，
6總係佢並無㓾佢等个子女。佢照上主在摩西法律書中个命令來做；上主講：「爺𡟓無應該因為子女所犯个罪來處死；子女也無應該因為爺𡟓所犯个罪來處死。逐儕應當擔當自家所犯个罪。」
7亞瑪謝在死海南片个鹽谷㓾掉一萬以東人，又佔領西拉城，將它个名改做約帖，直到今晡日。
8亞瑪謝派使者去見耶戶个孫仔、約哈斯个孻仔以色列王約華施，激佢講：「𠊎等來去戰場拚輸贏！」
9總係以色列王約華施派使者去見猶大王亞瑪謝，應佢講：「有一擺，黎巴嫩山頂个一頭竻仔對一頭香柏樹講：『將你个妹仔嫁給𠊎个孻仔啊！』無想到，有一隻野獸對該位過，該頭竻仔卻被牠蹂掉。
10亞瑪謝啊，打贏以東人你个心就恁驕傲噢！在屋下享受你个光榮就好了；何麼死苦惹這個災禍，害你㧯猶大人民共下滅亡？」
11亞瑪謝毋聽。所以以色列王約華施帶領軍隊，在猶大个伯‧示麥㧯猶大王亞瑪謝相㓾。
12猶大軍隊打輸，所有士兵全部走轉屋下去。
13以色列王約華施在伯‧示麥捉到亞哈謝个孫仔、約阿施个孻仔猶大王亞瑪謝，然後進攻耶路撒冷，將以法蓮門到角門大約兩百公尺長个一段城牆全部拆掉。
14約華施又將上主个聖殿肚所有个金銀、用品，㧯王宮个財寶全部帶轉撒馬利亞，也帶兜人做人質。
15約華施其他个事，包含佢㧯猶大王亞瑪謝相㓾這兜英勇个事，全部記在《以色列列王史》底背。
16約華施死掉，葬在撒馬利亞，以色列个王室墳墓肚；佢个孻仔耶羅波安二世承接佢做王。
17以色列王約哈斯个孻仔約華施死後，猶大王約阿施个孻仔亞瑪謝還食加十五年。
18亞瑪謝其他个事全部記在《猶大列王史》底背。
19在耶路撒冷，有人造反愛謀殺亞瑪謝，所以佢逃到拉吉城；總係造反个派人逐到該位，將佢㓾掉。
20有人將佢个屍體用馬仔載轉耶路撒冷，葬在大衛城个王室墳墓肚。
21所有个猶大人民設立厥十六歲个孻仔烏西雅承接佢做王。
22亞瑪謝王死掉以後，烏西雅將以拉他收轉來歸屬猶大，重新修建。
23猶大王約阿施个孻仔亞瑪謝在位第十五年，約華施个孻仔耶羅波安二世做以色列王；佢在撒馬利亞統治四十一年。
24佢行上主看做邪惡个事，學厥祖先尼八个孻仔耶羅波安个壞模樣，害以色列人犯罪。
25佢將所有屬以色列个土地收轉來，對北方个哈馬隘口直到南方个死海。這係上主—以色列个上帝通過佢个僕人迦特‧希弗人亞米太个孻仔，先知約拿所預言个。
26上主看到所有个以色列人，無論自由抑係無自由个，受到當大个苦難，無人幫助佢等。
27上主毋拌得以色列人滅掉去，所以佢通過約華施个孻仔耶羅波安二世拯救佢等。
28耶羅波安二世其他个事，佢在戰場个勇敢㧯佢樣般將大馬士革㧯哈馬收轉來歸屬以色列，全部記在《以色列列王史》底背。
29耶羅波安二世死掉，葬在以色列个王室墳墓肚；佢个孻仔撒迦利雅承接佢做王。