1示巴女王聽到所羅門王个名聲，就到耶路撒冷來，想愛用困難个問題來考所羅門。有一大群人跈等姖，帶等一大隊駱駝載等香料、珠寶㧯當多黃金。姖看到所羅門个時，將心中所想到个問題全部拿來問。
2所羅門一一回答姖所有个問題，無一隻問題考倒佢。
3示巴女王聽到所羅門智慧个話，也看到佢所起个王宮，
4又看到佢桌頂豐富个食物、厥官員住个屋、王宮僕人个組織㧯所著个制服、斟酒个僕人㧯佢等个衫褲、並聖殿肚所獻个燒化祭，歸隻人戇掉去。
5姖對所羅門王講：「𠊎在自家个國家所聽到有關你个成就㧯智慧全部係斷真个！
6𠊎原來毋信，總係𠊎來到這位親眼看到這一切正相信。有關你个智慧，𠊎聽到个還吂有一半；你比別人傳講个還較有智慧。
7服事你个人樣般恁有福氣啊！佢等有好常常在你面前聽你智慧个話！
8願上主—你个上帝得到讚美！佢設立你做王，使你奉佢个名統治，表示佢樣般中意你。因為你个上帝痛惜佢个子民以色列，愛永遠保護佢等，所以設立你做佢等个王，愛你維護法律，伸張正義。」
9示巴女王將帶來个禮物送給所羅門王：大約有四千公斤重个黃金，當多香料㧯寶石。所羅門王從來毋識收過比示巴女王所送還較高貴个香料。
10(希蘭王㧯所羅門王个僕人對俄斐運金仔來，也運來檀香木㧯珠寶。
11所羅門王用這兜檀香木做上主聖殿㧯王宮个樓梯，也為樂師歌手製造豎琴㧯七弦琴。猶大地從來毋識看過恁好个檀香木。)
12所羅門王也當慨，送示巴女王各種禮物，除了照例愛送个禮物以外，凡係示巴女王所要求个，佢全部給姖。女王㧯跈姖个人就轉示巴去了。
13所羅門王逐年收到兩萬三千公斤个黃金，
14另外還有生理人納个稅。阿拉伯該兜王㧯以色列逐地區个總督也向所羅門進貢金銀。
15所羅門王製造兩百垤大盾牌，逐垤用大約七公斤个金仔打个。
16佢又製造三百垤細盾牌，逐垤用大約三公斤个金仔打个。佢將這兜盾牌放在黎巴嫩林宮肚。
17所羅門王又用象牙製造一隻大寶座，用純金包等。
18寶座頭前有六層段仔，連等一張包金个腳凳。寶座兩片有扶手，逐片有一座獅仔。
19逐層段仔个兩頭也各有一座獅仔，總共十二座。其他國家全部毋識有恁樣个寶座。
20所羅門王所有个酒杯全部係金仔做个；所有在黎巴嫩林宮肚个碗盤全部係純金做个，毋係用銀仔做个；因為在所羅門个時代，銀仔毋係貴重个。
21所羅門王有一隊大船，㧯希蘭王个船隊共下出海；船隊三年轉來一擺，帶等金銀、象牙、猴仔㧯孔雀轉來。
22所羅門王个好額㧯聰明贏過世上所有个君王。
23全世界逐個王全部想愛來見所羅門，愛聽上帝賜給佢智慧个話。
24佢等逐年帶禮物給佢，有金器、銀器、衫褲、武器、香料、馬㧯騾仔。
25所羅門有四千間馬篷放戰車㧯馬，又有一萬兩千騎兵。佢將一部份安排到耶路撒冷，其他个分駐到逐個城市
26所羅門統治對幼發拉底河到非利士㧯埃及邊境所有个王。
27在佢統治期間，耶路撒冷个銀幣像石頭恁多，香柏樹也像高原个桑仔樹恁普遍。
28所羅門个生理人對慕茲黎㧯別个國家進口馬仔。
29所羅門其他个事，對頭到尾，全部記在《先知拿單个書》、《示羅人亞希雅个預言書》，㧯《先見易多个異象書》。最尾一本書係記載以色列王耶羅波安个事。
30所羅門在耶路撒冷做王，統治全以色列四十年。
31所羅門過身後，葬在厥爸大衛个城；佢个孻仔羅波安承接佢做王。