1該時，所羅門祈禱講：「上主啊，你決定愛住在賁賁个烏雲肚。
2𠊎已經為你起一座偉大个殿，做你永遠住个所在。」
3以色列會眾全部企在該位。所羅門王轉過身來，面對會眾，為佢等向上帝求福。
4佢講：「讚美上主—以色列个上帝！佢親自完成佢向吾爸大衛所應許个；佢識親嘴㧯大衛講：
5『自從𠊎將𠊎个子民帶出埃及以來，𠊎無選以色列㖠座城來起敬拜𠊎个聖殿；𠊎也無選麼人來帶領𠊎个子民以色列。
6總係這下，𠊎選耶路撒冷做敬拜𠊎个所在，又揀選你—大衛來統治𠊎个子民。』」
7所羅門繼續講：「吾爸大衛計劃起聖殿，做敬拜上主—以色列上帝个所在。
8毋過上主對佢講：『你想愛為𠊎起聖殿，這心意當好；
9總係你做毋得開工，只有你个孻仔—你親生个孻仔正做得起𠊎个聖殿。』
10「這下上主已經實現佢个應許。𠊎承接吾爸大衛做以色列个王，又已經起好敬拜上主—以色列上帝个聖殿。
11𠊎也將約櫃放在聖殿肚。約櫃底背放等立約个石版；這就係上主㧯以色列人立个約。」
12接等，所羅門在以色列會眾面前行到上主个祭壇前企等，擎起雙手祈禱。
13(所羅門識喊人做一個銅臺，放在庭院中央，兩公尺兩公寸四方，高一公尺三公寸。所羅門企在臺頂，在逐儕看得到个所在跪下來，向天擎起雙手。)
14佢祈禱講：「上主—以色列个上帝啊，天頂地上無別个神做得㧯你比！你信守你㧯你僕人所立个約：該兜一心一意順服你个，你就愛向佢等顯出慈愛。
15你親自完成你向你个僕人—吾爸大衛个應許，到今晡日，逐隻字、逐句話全部實現了。
16上主—以色列个上帝啊，這下𠊎求你也實現你向吾爸所講个其他个應許：你識㧯佢講，若係佢个後代像佢共樣，認真遵行你个法律，佢个後代就會永遠有人做以色列个王。
17所以，上主—以色列个上帝啊，求你實現向你个僕人大衛所應許个話。
18「上帝啊，你斷真會住在地上，在世人當中嗎？就算天㧯天頂个天也毋罅你住，𠊎所起个這聖殿算麼介呢？
19上主—𠊎个上帝啊，𠊎係你个僕人；求你聽𠊎个祈禱，聽𠊎在你面前个求喊。
20求你日夜看顧這聖殿；這係你識應許愛做敬拜你个所在。你个僕人面對這聖殿祈禱个時，求你聽𠊎个祈求。
21你个僕人㧯你个子民以色列面對這所在祈禱个時，求你對天頂你住个所在聽𠊎等个祈求，赦免𠊎等。
22「若係有人得罪同胞被人告，被人帶到這聖殿—你个祭壇前，發誓講佢係無罪个，
23上主啊，求你對天頂聽，來審判你个僕人：有罪个，就照佢該得个責罰佢；無罪个，就判佢無罪，還佢清白。
24「若係你个子民以色列因為得罪你被敵人打贏，後來又悔改歸向你，尊你个名做大，到這聖殿來，謙卑祈求你个赦免，
25求你對天頂聽佢等个祈求，赦免你子民个罪，𢱋佢等轉到你賜給佢等㧯佢等祖先个這垤土地。
26「若係有你个子民得罪你，你使天無落雨，後來佢等悔改，尊你个名做大，面對這聖殿，謙卑向你祈禱，
27求你對天頂聽佢等个祈求。求你赦免你个僕人—以色列人民个罪，教佢等行正直个路。該時，上主啊，求你落水在你个土地上，就係你賜給你子民做產業个土地。
28「若係國內有飢荒、發瘟、燒風、生菇、草蜢、禾蝦，抑係你个子民被仇敵圍困，抑係堵到其他災禍病痛，
29求你聽佢等个祈禱。若係你个子民以色列中有人憂傷痛苦，伸出雙手向這聖殿祈禱，
30求你對天頂你住个所在聽佢等个祈求，來赦免佢等。只有你深知人心。求你照逐儕所做个款待佢等，
31使你个子民永遠在你賜給𠊎等祖先个土地上敬畏你，順服你。
32「若係有一個住在遠方个外族人聽到你个大名㧯大有能力、隨時幫助人个手，就來向這聖殿祈禱，
33求你對天頂你住个所在聽佢个祈求，照佢向你所求个答應佢，使全世界个人全部像你个子民以色列共樣認識你，敬畏你，使佢等知𠊎所起个這聖殿就係敬拜你个所在。
34「若係你个子民照你个命令上戰場㧯敵人相㓾，無論佢等在麼介地方，面對你所選个這城㧯𠊎為你起个這聖殿祈禱，
35求你聽佢等。求你對天頂聽佢等个祈禱，使佢等得勝。
36「若係你个子民得罪你(世上無人係無犯罪个)，你發譴个時准敵人打贏佢等，將佢等捉去別个地方，無論係遠抑係近，
37也求你聽你子民个祈禱。若係佢等在該位悔改，向你祈求，承認佢等犯罪、行事邪惡，上主啊，求你聽佢等个祈禱。
38若係佢等在該地方誠心誠意悔改，面對你賜給𠊎等祖先个這垤土地向你祈禱，面對你所選个這城㧯𠊎為你起个這聖殿祈禱，
39求你聽佢等。求你對天頂你住个所在聽佢等个祈求，憐憫佢等，赦免你子民所有个罪。
40「𠊎个上帝啊，這下求你目珠打開來看，耳公注意來聽𠊎等在這位所獻个祈禱。
41主上帝啊，求你䟘起來進入你休息个地方，㧯代表你大能个約櫃共下入去聖殿。主上帝啊，求你賜福給你該兜祭司所做个一切；願你所有个聖民因為你个良善快樂。
42上主—上帝啊，毋好㧒掉你所選立个王。求你記得你對你僕人大衛个慈愛。」