1瑪拿西十二歲个時做猶大王，在耶路撒冷統治五十五年。
2瑪拿西行上主看做邪惡个事，就像上主在佢个子民面前逐走个原來外族人所做積惡个事。
3佢重新起厥爸希西家所拆掉山岡頂个神廟，又起祭壇拜巴力，打造亞舍拉女神个柱像，也敬拜事奉天象。
4佢在耶路撒冷、就在上主吩咐愛永遠敬拜上主个聖殿底背起異教个祭壇，
5又在聖殿个兩隻庭院肚起拜天象个祭壇。
6佢在欣嫩子山壢將自家个孻仔放火燒獻給神明，又去卜卦、用法術、行邪術、求問交鬼个㧯算命个。佢行當多上主看做邪惡个事，惹佢發譴。
7佢將偶像放在上帝个聖殿底背。論到聖殿，上帝識對大衛㧯厥孻仔所羅門講：「耶路撒冷个聖殿就係𠊎對以色列十二支族个土地中選出來、愛永遠做敬拜𠊎个地方。
8若係以色列人民認真聽從𠊎所有个誡命，遵守摩西吩咐佢等所有个法律，𠊎一定毋會俾佢等對𠊎賜給佢等祖先个這垤土地被人逐走。」
9總係瑪拿西帶猶大㧯耶路撒冷人民犯罪，比上主對佢个子民面前逐走个原來外族人所犯个罪還較嚴重。
10雖然上主警告瑪拿西㧯佢个人民，佢等還係毋聽。
11所以上主俾亞述皇帝个將軍帶軍隊來侵犯猶大。佢等捉到瑪拿西，用鉤仔鉤等佢，銅鍊仔鎖等佢，捉到巴比倫去。
12瑪拿西受到痛苦个時謙卑下來，轉向上主—佢个上帝、厥祖先个上帝，祈求佢个幫助。
13上帝聽佢个祈禱，准佢个祈求，俾佢倒轉耶路撒冷做王。因為這件事，瑪拿西正確信上主就係上帝。
14這事以後，瑪拿西將大衛城東片个外城牆加高，對基訓泉水附近个山壢向北到魚門㧯城肚俄斐勒地區。佢也在猶大逐防衛城派軍隊，有軍官指揮。
15佢將以前放在上主聖殿肚个外族神像除掉，也將佢在聖殿山頂㧯耶路撒冷其他所在所起个異教祭壇拆掉。瑪拿西將這兜東西搬出城外㧹掉。
16佢修整敬拜上主个祭壇，在祭壇頂高獻平安祭㧯感恩祭。佢命令猶大所有人民愛敬拜上主—以色列个上帝。
17雖然人民繼續在其他个山頂獻祭，總係佢等只有獻給上主—佢等个上帝。
18瑪拿西其他个事，包含佢向上帝个祈禱，並先見奉上主—以色列个上帝對佢講个話，全部記在《以色列列王史》底背。
19王个祈禱㧯上帝个回答，並佢在悔改前所犯个罪—就係佢所做个壞事，像起造山頂个神廟，打造亞舍拉女神个柱像㧯其他敬拜雕刻个偶像，全部記在《先見史》底背。
20瑪拿西死後葬在自家个王宮肚；佢个孻仔亞們承接佢做王。
21亞們二十二歲个時做猶大王，在耶路撒冷統治兩年。
22佢像厥爸瑪拿西行上主看做邪惡个事，拜厥爸所造个偶像。
23總係亞們無像厥爸謙卑轉向上主，反轉比厥爸犯還較重个罪。
24亞們个官員造反，在王宮肚將佢㓾掉。
25總係猶大人民將該兜謀殺亞們王个人㓾掉，設立厥孻仔約西亞承接佢做王。