1節期結束以後，所有个以色列人到猶大逐城去，敲碎石柱，斬斷亞舍拉女神个柱像，除掉祭壇㧯山岡頂个神廟。佢等也在猶大其他地區㧯便雅憫、以法蓮、瑪拿西境內做共樣个事，然後轉到家鄉。
2希西家王重新組織祭司㧯利未人个輪班，在這制度下，逐儕全部有特別个職務。佢等个工作包含獻燒化祭㧯平安祭，在聖殿事奉，在聖殿逐隻門內獻頌讚㧯感謝。
3王又奉獻自家个牛羊做逐日早暗个燒化祭，也做安息日、逐隻月初一、㧯其他節期所愛獻个燒化祭，全部照上主法律所規定。
4另外王吩咐耶路撒冷个人民將祭司㧯利未人應該得个份額帶來，使佢等做得專心做上主法律所規定个事。
5命令一下來，以色列人就將佢等新出个五榖、酒、橄欖油、蜂糖㧯其他農產物帶來，也將所有東西个十分之一帶來。
6住在猶大逐城个以色列人㧯猶大人全部將佢等牛羊个十分之一帶來，也奉獻十分之一分別為聖个禮物給上主—佢等个上帝。
7對三月開始，禮物一直送入來，堆到像山。這情形一直到七月。
8希西家㧯該兜領袖看到恁多个禮物就頌讚上主，又祝福佢个子民以色列。
9希西家問祭司、利未人樣般有恁多禮物；
10撒督个後代亞撒利雅大祭司應講：「對人民開始帶禮物到上主个聖殿以來，毋單淨罅食，還賸當多，因為上主賜福給佢个子民。」
11佢等奉希西家个命令在上主个聖殿預備倉庫，
12忠實將所有个禮物㧯十分之一奉獻放在底背。佢等派利未人歌楠雅管理，派歌楠雅个老弟示每做助手。
13佢等又派十個利未人在佢兩儕手下工作；這十儕个名仔係：耶歇、阿薩細雅、拿哈、亞撒黑、耶利末、約撒拔、以列、伊斯瑪基雅、瑪哈、比拿雅。這事係奉希西家王㧯亞撒利雅大祭司个命令做个。
14利未人音拿个孻仔可利係聖殿東門个守衛長；佢負責收獻給上主个禮物，也負責分禮物。
15在祭司住个其他个城，有以下个利未人忠實協助佢。佢等个名仔係：伊甸、珉雅珉、耶書亞、示瑪雅、亞瑪利雅、示迦尼雅。這兜人將食物平均分給利未人，係照逐儕个職務，
16毋係照宗族分个。所有三十歲以上个男人、逐日在聖殿值班个，照職務輪班，逐儕做得分到一份。
17祭司係照宗族來分；二十歲以上个利未人係照職務㧯輪班來分。
18佢等㧯佢等个𡜵娘、子女，並其他屋下人全部共下登記；因為佢等忠誠，將自家分別為聖。
19住在亞倫後代所得个城抑係城外該兜祭司，該兜負責个人將食物分給祭司家族所有个男人㧯利未族譜所記个逐個人。
20希西家在猶大全地做上主—佢个上帝看做良善、正直、忠實个事。
21佢非常成功；因為佢所做个，無論係有關上帝个聖殿抑係遵行法律个逐件事，全部專心尋求上帝个旨意。