1約阿施七歲个時做猶大王，在耶路撒冷統治四十年。厥姆西比亞係別是巴城个人。
2約阿施在祭司耶何耶大還生个年日行上主看做著个事。
3耶何耶大為約阿施王選兩個𡜵娘；姖兩儕為王生養子女。
4約阿施在位無幾久就決定愛整上主个聖殿。
5佢命令祭司㧯利未人到猶大逐城向人民收稅，做逐年整上帝聖殿个費用。佢愛佢等趕緊辦理，總係利未人延纏時間。
6約阿施王將佢等个領袖耶何耶大喊來，問佢：「你做麼介無監督利未人向猶大㧯耶路撒冷人民收稅呢？這稅係上主个僕人摩西規定以色列人民納个，為到愛維持上主約櫃个聖帳篷。」
7(原來該壞婦人家亞她利雅个手下損壞上帝个聖殿，又拿聖殿中盡多聖物去拜巴力。)
8王命令利未人做一隻奉獻箱，放在聖殿門口，
9吩咐佢等到耶路撒冷㧯猶大逐所在㧯人民講，將上帝僕人摩西以前在曠野規定徵收个稅帶來獻給上主。
10人民㧯該兜領袖全部當歡喜，就將佢等个稅金帶來，放在箱仔肚。
11逐日利未人將箱仔扛到王所指派監督這箱仔个官員該位。箱仔裝滿个時，王室書記㧯大祭司个代表就將錢拿出來，將箱仔放轉去。恁樣，佢等收到盡多个錢。
12王㧯耶何耶大將錢交給負責整聖殿个人，喊佢等請打石、木匠、打鐵、打銅个師傅來進行整聖殿个工作。
13所有个工人全部煞猛工作，將上帝个聖殿整到原來个樣仔，㧯以前共樣恁堅固。
14修整工作結束，佢等將賸到个金銀交給王㧯耶何耶大；耶何耶大用它來製造聖殿个盤碗㧯其他用品，在禮拜㧯獻祭个時使用。耶何耶大還生个年日，人民常常在上主个聖殿照時獻燒化祭。
15耶何耶大食到當老，一百三十歲正過身。
16為到紀念佢為以色列人民，又為上帝㧯聖殿所做个一切，佢等將佢葬在大衛城个王室墳墓肚。
17耶何耶大死後，猶大該兜領袖來朝拜約阿施王，王就聽從佢等个建議。
18所以人民無在上主个聖殿敬拜佢等祖先个上帝，反轉去拜亞舍拉女神㧯其他偶像；因為佢等所犯个罪，上主對猶大㧯耶路撒冷發譴。
19上主派先知警告佢等，愛佢等歸向佢，總係人民毋聽。
20後來，上帝个靈感動祭司耶何耶大个孻仔撒迦利亞；佢就企在人民看得到个所在，喊講：「上帝問：你等做麼介違背上主个命令來惹災禍？你等離開上主，所以佢也愛離開你等！」
21大家就想謀害撒迦利亞；王喊人民在上主聖殿个庭院肚用石頭將佢㧹死。
22約阿施王毋記得撒迦利亞个阿爸耶何耶大對佢个恩情，反轉將撒迦利亞㓾掉。撒迦利亞斷氣前講：「願上主看到你所做个，責罰你！」
23該年秋天，敘利亞軍隊來攻打約阿施王，來到猶大㧯耶路撒冷，㓾掉所有个領袖，又搶走盡多戰利品運到大馬士革王該位。
24敘利亞軍隊只有一細隊，總係上主使佢等打贏比佢等強大个猶大軍隊，因為人民離開上主—佢等祖先个上帝。上主用這方法責罰約阿施王。
25佢受重傷。軍隊撤退个時，厥手下兩個軍官造反，將佢㓾死在眠床頂，為到報祭司耶何耶大个孻仔被佢㓾死个冤仇。約阿施葬在大衛城，總係毋係在王室个墳墓肚。
26(造反个係亞捫婦人示米押个孻仔撒拔㧯摩押婦人示米利个孻仔約薩拔。)
27約阿施該兜孻仔个事、盡多對佢毋好个預言、㧯佢修整上帝聖殿个事，全部記在《列王史》底背。佢个孻仔亞瑪謝承接佢做王。