1猶大王約沙法平安轉到耶路撒冷王宮。
2先見哈拿尼个孻仔耶戶去見王，對佢講：「你認為幫助壞人、惜該兜惱上主个人敢著？你所做个惹上主發譴。
3雖然恁樣，你還有兜仔好處。你廢掉國內所有亞舍拉女神个柱像；你決心愛尋求上帝。」
4約沙法王住在耶路撒冷，總係佢定期出巡民間，對南部个別是巴到北部以法蓮山區个邊界，喊人民歸向上主—佢等祖先个上帝。
5佢在猶大逐防衛城設立審判官，
6對佢等講：「你等辦事愛謹慎；你等毋係為人辦事，係為上主。你等宣判个時，上主㧯你等共下。
7愛敬畏上主，辦事謹慎；因為上主—𠊎等个上帝係公義个，毋准你等偏心，抑係被人收買。」
8約沙法也在耶路撒冷指派利未人、祭司㧯其他領袖做審判官，裁判違犯上主法律个案件㧯民間个糾紛。
9佢指示佢等講：「你等愛用敬畏上主个心執行任務，愛忠心誠實辦事。
10若係對逐所在有同胞因為㓾人抑係任何違犯法律誡命个案件送到你等面前，你等一定愛認真指導佢等在審問期間應該樣般做，恁樣，佢等正毋會得罪上主。若係你等恁樣做，你等就無罪。若無，你㧯你个同胞會惹上主發譴。
11大祭司亞瑪利雅愛管理你等所有屬上主个事；猶大支族个族長，以實瑪利个孻仔西巴第雅愛管理你等所有屬王个事。利未人愛負責監督法庭判決个事。你等愛勇敢去實行以上个指示。願上主㧯善良个人共下。」