2 Kings 22
1 約西亞八歲个時做猶大王；佢在耶路撒冷統治三十一年。厥姆安到耶底大，係波斯加城亞大雅个妹仔。
2 約西亞行上主看做著个事，行厥祖先大衛王个路，無偏左、無偏右。
3 約西亞王在位第十八年，佢派米書蘭个孫仔，亞薩利雅个孻仔—王室書記沙番到上主个聖殿去，吩咐佢講：
4 「你到大祭司希勒家該位去，喊佢將聖殿掌門个對人民收集个錢銀算好。
5 愛將該兜錢交給整上主聖殿个該幾個監工；佢等好付工錢給整聖殿个工人，
6 就係木匠、建築工人、泥水師傅，還愛買整聖殿用个樹料㧯石材。
7 因為該幾個監工全部誠實可靠，所以毋使㧯佢等算數。」
8 該時，大祭司希勒家㧯書記沙番講：「𠊎在上主个聖殿肚發現法律書。」希勒家將書交給沙番，沙番就讀了。
9 然後書記沙番到王該位報告講：「你个官員已經將聖殿收到个錢，交給整聖殿个該幾個監工。」
10 書記沙番又對王講：「祭司希勒家拿一卷書給𠊎。」沙番就讀給王聽。
11 王聽到法律書个話就扯爛衫，
12 吩咐祭司希勒家、沙番个孻仔亞希甘、米該亞个孻仔亞革波、王室書記沙番、㧯王个僕人亞撒雅，講：
13 「你等去為𠊎㧯全猶大人民求問上主，到底這卷書个教訓係麼介。上主向𠊎等大發譴係因為𠊎等个祖先無聽從這書个話，無照這書所記載个去做。」
14 希勒家祭司、亞希甘、亞革波、沙番、㧯亞撒雅去求問一個名喊戶勒大个女先知。女先知住在耶路撒冷个第二區。(厥老公沙龍係特瓦个孻仔，哈珥哈斯个孫仔，擔任主管聖殿禮服个職務。)佢等向姖講起所發生个事。
15 姖喊佢等轉去對王講：「上主—以色列个上帝恁樣講：
16 『𠊎愛照猶大王所聽到該本書所寫个一切話，降災禍給耶路撒冷㧯這位所有个人民。
17 佢等離開𠊎，向別个神明燒香，用佢等个手所造个偶像惹𠊎受氣，所以𠊎愛向耶路撒冷大發譴無煞。』
18 有關猶大王本人，你等愛恁樣㧯佢講：『上主—以色列个上帝恁樣講：你一聽到該本書所寫个，
19 就在𠊎面前謙卑悔改。你一聽到𠊎愛責罰耶路撒冷㧯它个人民，使它成做荒涼、受咒詛个地方，你扯爛衫，在𠊎面前流目汁悔改，𠊎就聽你个祈禱。
20 因為恁樣，𠊎一定會使你平平安安食到老，葬在你列祖个墳墓該位；你還在世間个時，毋會看到𠊎降災難給這地方。』」佢等就將這消息帶轉去㧯王講。