2 Kings 21
1 瑪拿西十二歲个時做猶大王；佢在耶路撒冷統治五十五年。厥姆安到協西巴。
2 瑪拿西行上主看做邪惡个事，就像上主在佢个子民面前逐走个原來外族人所做積惡个事。
3 佢重新起厥爸希西家所拆掉山岡頂个神廟，又起祭壇拜巴力，打造亞舍拉女神个柱像，像以色列王亞哈所做个，還去敬拜事奉天象。
4 佢在耶路撒冷、就在上主吩咐愛敬拜上主个聖殿底背起異教个祭壇，
5 又在聖殿个兩隻庭院起拜天象个祭壇。
6 佢將自家个孻仔放火燒獻給神明，又去卜卦、行邪術，求問交鬼个㧯算命个。佢行當多上主看做邪惡个事，惹佢發譴。
7 佢將該亞舍拉女神个柱像放在聖殿底背。論到聖殿，上主識對大衛㧯厥孻仔所羅門講：「耶路撒冷个聖殿就係𠊎對以色列十二支族个土地中選出來、愛永遠做敬拜𠊎个地方。
8 若係以色列人民認真聽從𠊎所有个誡命，遵守𠊎僕人摩西吩咐佢等所有个法律，𠊎一定毋會俾佢等對𠊎賜給佢等祖先个這垤土地上被人逐走。」
9 總係猶大人民毋聽從上主个命令。瑪拿西帶佢等犯罪，比上主對佢个子民面前逐走个原來外族人所犯个罪還較嚴重。
10 上主通過佢个僕人—眾先知講：
11 「猶大王瑪拿西做這兜邪惡个事，比先前亞摩利人所做个還較壞；佢用偶像引誘猶大人民犯罪。
12 所以，𠊎—上主、以色列个上帝決定愛降災禍給耶路撒冷㧯猶大，使所有聽到這事个人全部著驚、耳公咻咻滾。
13 𠊎愛用共樣个標準責罰耶路撒冷，像𠊎責罰撒馬利亞恁樣，又像𠊎責罰以色列王亞哈㧯佢个後代一樣。𠊎愛除掉耶路撒冷个人民，像人拭淨盤仔，將耶路撒冷揙轉來。
14 𠊎愛㧒掉該兜賸到个人民，將佢等交給仇敵；該兜仇敵愛搶佢等，將佢等捉走。
15 𠊎愛恁樣對待𠊎个子民，因為佢等得罪𠊎，惹𠊎發譴，對佢等个祖先出埃及直到這下。」
16 瑪拿西毋單淨帶猶大人民犯罪，害佢等行上主看做邪惡个事，佢又㓾掉盡多無辜个人民，使耶路撒冷滿遍係血。
17 瑪拿西其他个事，連佢所犯个罪，全部記在《猶大列王史》底背。
18 瑪拿西死掉，葬在自家王宮內烏撒个墓園肚；佢个孻仔亞們承接佢做王。
19 亞們二十二歲个時做猶大王；佢在耶路撒冷統治兩年。厥姆安到米舒利密，係約提巴城哈魯斯个妹仔。
20 亞們㧯厥爸瑪拿西共樣行上主看做邪惡个事。
21 佢學厥爸所有个行為，拜厥爸所拜个偶像。
22 佢離開上主—厥祖先个上帝，毋遵行上主个道路。
23 亞們王个官員造反，在王宮將佢㓾掉。
24 總係猶大人民將該兜謀殺亞們王个人㓾掉，設立亞們个孻仔約西亞承接佢做王。
25 亞們其他个事全部記在《猶大列王史》底背。
26 亞們葬在烏撒个墓園內，自家个墳墓肚；厥孻仔約西亞承接佢做王。