2 Kings 18
1 以色列王以拉个孻仔何細亞在位第三年，亞哈斯个孻仔希西家做猶大王。
2 該時希西家二十五歲；佢在耶路撒冷統治二十九年。厥姆安到亞比雅，係撒迦利雅个妹仔。
3 希西家學厥祖先大衛王个模樣，行上主看做著个事。
4 佢除掉山岡頂个神廟，拆掉石柱，斬掉亞舍拉女神个柱像，又打碎摩西所造个銅蛇—尼忽士但，因為以色列人民直到該時還向它燒香。
5 希西家信靠上主—以色列个上帝；在佢前後个猶大列王，無一個㧯佢比抑得。
6 佢對上主忠心，毋識違背上主；佢謹慎遵守上主給摩西所有个誡命。
7 所以上主㧯佢共下；佢所做个全部順利。佢反亞述皇帝，毋肯服事佢。
8 佢打贏非利士人，將佢等个土地，包含迦薩㧯四周圍个地區，對守望台到防衛城，全部佔領了。
9 希西家王在位第四年，也就係以拉个孻仔何細亞王統治以色列第七年，亞述皇帝撒縵以色侵略以色列，圍攻撒馬利亞。
10 包圍三年後，就佔領撒馬利亞；這係希西家在位第六年，以色列王何細亞在位个第九年發生个。
11 亞述皇帝將以色列人捉到亞述，將佢等分散到哈臘城、歌散區个哈博河附近、㧯米底亞人个城市去住。
12 撒馬利亞被人佔領係因為以色列人毋聽從上主—佢等个上帝，違背上主㧯佢等所立个約，就係上主个僕人摩西所吩咐一切个法律；佢等毋聽從，也毋遵守。
13 希西家王在位第十四年，亞述皇帝西拿基立攻打猶大所有个防衛城，將它兜佔領。
14 猶大王希西家派人到拉吉去見亞述皇帝，講：「𠊎得罪你；請你退兵！𠊎答應你所有个要求。」亞述皇帝罰猶大王希西家一萬公斤个銀仔㧯一千公斤个金仔。
15 希西家將上主个聖殿㧯王宮寶庫肚个銀仔全部送過去，
16 又將聖殿門頂个金仔㧯包殿門柱仔个金仔全部剝下來，全部送給亞述皇帝。
17 亞述皇帝對拉吉派大軍到耶路撒冷攻打希西家王；佢个元帥、侍衛長㧯大將帶領軍隊。佢等一到耶路撒冷，就擺陣在上池个水溝滣，在通到染布工廠个大路項。
18 佢等呼喊王个時，希西家个三個大臣出來見佢等；這三個大臣係：希勒家个孻仔王宮總管以利亞敬，王室書記舍伯那，亞薩个孻仔歷史官約亞。
19 亞述个大將對佢等講：「你等去㧯希西家講，亞述大皇帝恁樣講：『你憑麼介恁有把扼？
20 你恅到賣嘴花就有相㓾个計謀㧯能力係麼？你靠麼人想愛反𠊎？
21 你毋使想埃及會來幫助你，該就像拄等一支玭掉个蘆竹準做柺棍仔行路；它會刺穿人个手。埃及王對付所有投靠佢个人就係恁樣。
22 可能你等會對𠊎講：𠊎等倚靠上主—𠊎等个上帝。總係，希西家敢毋係廢掉佢山頂个廟㧯祭壇？佢敢毋係吩咐猶大㧯耶路撒冷个人民，單淨做得在耶路撒冷个祭壇敬拜上主嗎？』
23 這下𠊎用吾主亞述皇帝个名義㧯你賭：若係你能尋出兩千騎兵，𠊎就送你兩千隻戰馬！
24 其實，你連亞述軍隊中最細个軍官也打毋贏，你還妄想愛靠埃及个戰車騎兵！
25 這下𠊎來攻打毀滅這地方，敢毋係上主个意思？上主親自吩咐𠊎來攻打毀滅這個國家。」
26 然後，以利亞敬、舍伯那、㧯約亞對該大將講：「先生，請用亞蘭話㧯僕人講話；𠊎等聽得識。毋好用希伯來話講，因為城樓頂个人民全部在該位聽。」
27 大將講：「你等恅到皇帝喊𠊎單單對你等㧯王講這兜話麼？𠊎也敢毋係對該兜坐在城樓頂个人民講，佢等㧯你等共樣，全部會食自家个屎，啉自家个尿？」
28 所以，大將企出來，用希伯來話大聲喊講：「你等愛聽亞述大皇帝个話！
29 皇帝警告你等：毋好被希西家欺騙；希西家無辦法救你等。
30 希西家雖然一直講：『上主一定會拯救𠊎等，這個城毋會交在亞述皇帝个手中』，總係你等毋好被佢騙去倚靠上主。
31 毋好聽希西家个話！亞述皇帝命令你等出來講和投降。恁樣，你等還係做得食自家个葡萄、自家个無花果，啉自家井肚个水。
32 直到皇帝將你等徙到另外一個地方，㧯你等這地方共樣，有五榖、葡萄，有餅、美酒。該係出產橄欖㧯蜂糖个地方。你等照皇帝个命令行，正會有命，毋使死。毋好被希西家騙去，恅到上主會來拯救你等。
33 你等看過有㖠隻國家个神明拯救自家个國家脫離亞述皇帝个手？
34 哈馬㧯亞珥拔个神明這下在㖠位？西法瓦音、希拿、以瓦个神明又在㖠位？佢等敢有來救撒馬利亞脫離𠊎个手？
35 有㖠兜神明識對𠊎个手拯救佢等个國家？上主敢會救耶路撒冷脫離𠊎个手？」
36 人民全部恬恬，無應半句話；因為希西家王識下令，講：「毋好應佢！」
37 該時，希勒家个孻仔王宮總管以利亞敬、王室書記舍伯那、㧯亞薩个孻仔歷史官約亞悲傷到扯爛衫，轉去將亞述大將个話向希西家王報告。