2 Chronicles 7
1 所羅門祈禱煞，有火對天頂降下來，將所獻个燒化祭㧯其他个祭物燒淨淨；上主个榮光充滿聖殿。
2 因為上主个榮光充滿上主个聖殿，所以祭司無法入去。
3 以色列眾人看到火對天頂降下來，看到上主个榮光充滿聖殿，佢等就伏在鋪石頭个地上敬拜上主，頌讚講：「上主係至善；佢个慈愛永遠長存。」
4 然後，王㧯全體人民獻牲儀給上主。
5 所羅門王獻兩萬兩千隻牛㧯十二萬隻羊做平安祭。恁樣，王㧯全體人民為上帝个聖殿舉行奉獻禮。
6 該兜祭司企在指定个所在；利未人企在佢等个面前，用大衛王該時特製个樂器頌讚上主，又照大衛所規定唱讚美个詩：「佢个慈愛永遠長存！」該兜祭司歕喇叭个時，以色列人全部企起來。
7 所羅門將上主聖殿頭前庭院中个廣場分別為聖，在該位獻燒化祭、素祭㧯平安祭所用頭牲个油。所羅門恁樣做係因為佢所造个銅祭壇忒細，無辦法放恁多个祭物。
8 所羅門㧯全體以色列人民在聖殿守搭寮仔節七日。民眾遠遠對北方哈馬隘口㧯南方个埃及邊境逐所在前來參加大會。
9 佢等用七日个時間奉獻祭壇，然後係七日个節期；第八日佢等舉行閉會典禮。
10 再過去該日，就係七月二十三，所羅門喊民眾轉屋下。佢等全部當歡喜快樂；因為上主賜福給佢个子民以色列，也賜福給大衛㧯所羅門。
11 所羅門完成上主个聖殿㧯王宮个工程，順利完成佢所計劃个所有工作後，
12 上主在暗晡時向佢顯現，對佢講：「𠊎已經聽到你个祈禱；𠊎選這聖殿做獻祭給𠊎个所在。
13 𠊎若毋落水，抑係使草蜢食淨農作物，抑係降瘟仔在𠊎子民身上，
14 假使𠊎親自所屬个子民謙卑下來，向𠊎祈禱，追求𠊎个恩惠，離開佢等所做个壞事，𠊎就會對天頂聽佢等个祈禱，赦免佢等个罪，醫治佢等个土地。
15 𠊎會看顧這聖殿，會聽在這位所獻个祈禱；
16 因為𠊎選它，使它分別為聖，這聖殿愛做永遠敬拜𠊎个所在。𠊎會常常在這位看顧它，關心它。
17 若係你像若爸大衛共樣忠心事奉𠊎，遵行𠊎个法律，照𠊎个命令去做，
18 𠊎一定會堅固你个王位，照𠊎向若爸大衛所應許个，就係佢个後代會永遠統治以色列。
19 若係你㧯你个人民斡頭離開𠊎，毋遵守𠊎給你等个法律㧯誡命，去敬拜別个神，
20 𠊎就會將你等對𠊎賜給你等个土地上挷出來；𠊎也會㧒掉這座𠊎識分別為聖、成做敬拜𠊎个聖殿。萬民會恥笑它，侮辱它。
21 「這下大家尊重這聖殿，總係到該時，過路人全部會著驚來問：『上主做麼介恁樣款待這國㧯這聖殿呢？』
22 人會應講：『因為佢等離開上主—佢等个上帝。上主識𢱋佢等个祖先對埃及出來，佢等反轉去親近、服事、敬拜別个神明，所以上主降這一切災難給佢等。』」