1有人講：「麼人想愛做監督，佢就係欣慕一件好个事工。」這句話係可靠个！
2監督定著愛係一個無好嫌个人。佢只有做得討一個𡜵娘；做人愛嚴肅，會約束自家，生活有規律，樂意款待外鄉人。佢一定愛曉得教導人；
3毋會酗酒，毋會打人，性情溫和，也無貪財。
4佢一定愛好好治理自家个家庭，管教子女，喊佢等用適當个尊敬來順服佢。
5一個人毋曉得處理自家个家庭，樣會看顧上帝个教會呢？
6監督也毋應該係正入教會个人，免得佢自高自大，陷在魔鬼所受个審判中。
7佢在教會外也愛有好名聲，免得佢受譭謗，陷落魔鬼个羅網底背。
8執事也的確愛有好德行。佢等講話愛誠實，做毋得酒醉㧯貪財；
9愛用清白个天良堅持信仰个奧秘。
10佢等應該先受考驗，無麼介好嫌正做得俾佢擔任職務。
11女執事也愛有好德行，毋會講閒話，穩重，凡事誠實可靠。
12每一個執事只有做得討一個𡜵娘，佢也愛好好管教子女㧯治理家庭。
13該兜在事奉个頂高有好表現个執事就得到好名聲，也會盡好膽講論佢等對基督耶穌个信仰。
14𠊎一片寫這封信仔，一片希望遽遽來看你；
15若係停跎，這封信仔係㧯你講，𠊎等在上帝个家庭中應該愛樣般行事。這個家庭就係永生上帝个教會，係真理个石柱㧯基礎。
16大家公認，𠊎等信仰个奧秘係樣般高深：佢用人个肉身顯現，被聖靈證明為義，被眾天使看見，被人傳到萬邦，被世間人相信，受接入榮耀。