1兄弟姊妹啊，你等自家知，𠊎等訪問你等並毋係無效个。
2你等知，𠊎等去你等該位以前，在腓立比已經受迫害，被人侮辱。總係，𠊎等个上帝賜𠊎等勇敢，雖然在當多个阻擋中，還係將佢个福音傳給你等。
3𠊎等个勸勉毋係對錯誤抑係無純正个動機來，也毋係想愛詐欺麼人。
4顛倒，上帝考驗又揀選𠊎等，將傳福音个任務託給𠊎等。所以，上帝愛𠊎等講麼介，𠊎等就講麼介。𠊎等毋係愛使人歡喜，係愛使該察驗𠊎等內心个上帝歡喜。
5你等知，𠊎等從來毋識講奉承你等个話，心也無存貪念；這係上帝做得為𠊎等做見證个。
6𠊎等無求人个稱讚，無論係你等个，抑係別人个。
7身為基督个使徒，本來𠊎等有權好要求你等个尊重；總係，在你等中間个時，𠊎等用溫柔款待你等，像阿姆養育子女一樣。
8𠊎等既然恁樣惜你等，毋單淨歡喜同你等分享上帝个福音，連𠊎等个生命也甘願給你等，因為你等係𠊎等所痛惜个！
9兄弟姊妹啊，你等應當記得，𠊎等係樣般煞猛勞碌來做事；𠊎等日夜工作，因為傳上帝个福音給你等个時節，無愛加添你等个負擔。
10你等係見證人，上帝也做得做證：對你等信个人，𠊎等个做人係樣般純潔、公正、無好嫌。
11你等知，𠊎等對你等每一個人，就像阿爸對自家个子女一樣：
12𠊎等鼓勵你等，安慰你等；𠊎等也一直勸話你等，行事愛使上帝歡喜；佢就係呼召你等來分享佢个主權㧯榮光个上帝。
13𠊎等也常常為這個事感謝上帝：聽到𠊎等所傳上帝个真道，你等就領受，並認為毋係人个話，係確確實實對上帝來个真道；這真道也在你等信个人中間做工。
14兄弟姊妹啊，你等所堵到个，同該兜在猶太地區，上帝个眾教會，就係屬基督耶穌个信徒所堵到个共樣。你等被自家个同胞迫害，就像佢等被猶太个同胞迫害共樣。
15該兜猶太人害死主耶穌㧯眾先知，又將𠊎等逐出去。佢等个所做，上帝盡無歡喜。佢等又㧯眾人對敵。
16連𠊎等對外邦人傳道理來使外邦人得救，佢等也愛反對。像恁樣，佢等个罪一直增加到滿滿；上帝个大發譴最尾臨到佢等了！
17兄弟姊妹啊，𠊎等受迫害，同你等暫時分開，係身體分開定定，𠊎等个心並無離開你等。𠊎等非常想念你等，想盡辦法愛再看到你等！
18𠊎等盡想愛再去你等該位！𠊎—保羅一擺又一擺打算愛轉去看你等，總係撒但阻擋𠊎等。
19𠊎等个主耶穌再來个時，在佢个面前，𠊎等个希望㧯歡喜，並所誇口个冕旒係麼介呢？敢毋係你等？
20你等確實係𠊎等个光榮，𠊎等个歡喜！