1有一個便雅憫支族个人，名安到基士；佢係亞別个孻仔、洗羅个孫仔，屬亞斐亞宗族、比歌拉家族个人。基士有錢，有地位。
2佢有一個孻仔名安到掃羅，係一個當紮磳、當緣投个後生人，無人㧯佢比抑得。掃羅比最高个以色列人還高加一隻頭。
3基士有幾隻驢仔打毋見掉；佢對掃羅講：「你帶一個僕人共下去尋驢仔！」
4佢等行遍以法蓮山區㧯沙利沙地區，總係無尋到。佢等繼續尋，經過沙琳地區，驢仔也無在該位。所以佢等到便雅憫地區去尋，還係無尋到。
5後來，佢等到蘇弗地，掃羅對佢个僕人講：「𠊎等轉去較好！驚怕吾爸無再愁驢仔，顛倒愁𠊎等。」
6僕人講：「等一下。在這城有一個神人，受大家尊重，因為佢所講个逐件事全部實現。𠊎等去問佢，無一定佢會㧯𠊎等講到㖠位去尋驢仔。」
7掃羅講：「若係𠊎等去見佢，有麼介東西好送給佢？𠊎等袋肚已經無食物，無東西好送給該神人。」
8僕人應講：「𠊎有一隻細銀幣，做得送該神人，請佢㧯𠊎等講，愛到㖠位去尋驢仔。」
12細妹仔應講：「係啊，佢在城肚。其實，佢就在你等頭前無幾遠！你等遽遽入城去尋佢。佢今晡日到城肚來，係因為民眾愛在山頂个祭壇獻祭。
13民眾一定愛等佢來，因為佢愛先為祭物祝福，佢等正做得食。若係你等這下就入城去，做得在佢上山食東西以前尋到佢。」
14掃羅㧯佢个僕人繼續向前行，愛入城个時，看到撒母耳向佢等這方向來，愛到敬拜个祭壇該位去。
15掃羅還吂到个前一日，上主已經指示撒母耳講：
16「天光日這時，𠊎會派一個便雅憫支族个人到你這位來。你愛用油膏佢，立佢做𠊎子民以色列个統治者。佢會救佢等脫離非利士人个手。𠊎个子民受苦，𠊎有看到；佢等个哀求𠊎有聽到。」
17撒母耳看到掃羅个時，上主對佢講：「看啊！這個人就係𠊎㧯你講个人；佢會治理𠊎个子民。」
18該時撒母耳來到城門堘；掃羅行前問佢：「請問，先見住在㖠位？」
19撒母耳應講：「𠊎就係先見。你先行，先到祭壇去。你兩儕今晡日愛㧯𠊎共下食飯；天光朝晨𠊎會回答你所有个問題，然後送你離開。
20三日前打毋見掉該幾隻驢仔，你毋使愁，已經尋到了。總係，以色列人民盡期待个係麼人呢？毋係你㧯若爸个家族嗎？」
21掃羅應講：「𠊎屬便雅憫支族，係以色列最細个支族。𠊎家族乜係便雅憫支族中最卑微个家族。你做麼介對𠊎講恁樣个話？」
22撒母耳𢱋掃羅㧯佢个僕人入去一間大房間，俾佢等坐大位。該位大約有三十個人客，大家全部坐好。
23撒母耳對煮食个講：「去將𠊎交給你該垤特別留下來个肉拿來。」
24煮食个就將該垤特選个後腿肉拿來，放在掃羅面前，撒母耳講：「這係為你留下个肉。拿去食！這係𠊎特別留下來，愛在人客面前給你个。」該日，掃羅就㧯撒母耳共下食飯。
25佢等對山頂个祭壇轉城以後，撒母耳㧯掃羅在屋頂講話。
26第二朝晨，佢等當早就䟘起來。撒母耳到屋頂喊掃羅：「愛準備好！𠊎送你轉。」掃羅準備好勢，㧯撒母耳共下到街項去。
27佢等行到城堘，撒母耳對掃羅講：「喊你个僕人先行。」僕人離開以後，撒母耳講：「在這位停一下，𠊎愛將上帝个話㧯你講。」