1所以基列‧耶琳城个人將上主个約櫃接過來，扛到一個細山頂，放在亞比拿達个屋下。佢等特別設立亞比拿達个孻仔以利亞撒看守上主个約櫃。
2約櫃留在基列‧耶琳城當久，大約有二十年，然後以色列人全部尋求上主个幫助。
3撒母耳對以色列人民講：「若係你等專心歸向上主，就一定愛除掉你等當中所有外族个神明㧯亞斯她錄女神个神像。你等愛將自家完全獻給上主，單單事奉佢。恁樣，佢就會救你等離開非利士人个手。」
4所以以色列人除掉該兜巴力㧯亞斯她錄偶像，單單事奉上主。
5撒母耳講：「愛召集所有以色列人到米斯巴，𠊎愛在該位為你等向上主祈禱。」
6所以佢等全部聚集到米斯巴。佢等打水，倒在上主面前，做獻給上主个祭物，又禁食歸日。佢等講：「𠊎等得罪上主了。」(米斯巴係撒母耳為以色列人處理糾紛个所在。)
7非利士人聽到以色列人聚集在米斯巴，該五個非利士領袖就帶領軍隊愛出來攻擊佢等。以色列人聽到這消息當驚，
8就對撒母耳講：「請繼續為𠊎等向上主—𠊎等个上帝祈禱，毋好停，求佢救𠊎等脫離非利士人个手。」
9撒母耳㓾一隻還食乳个細羊仔做全牲个燒化祭獻給上主。佢祈求上主幫助以色列；上主就聽佢个祈禱。
10撒母耳正獻燒化祭个時，非利士人來攻擊以色列。在該時，上主對天頂用雷公打非利士人，使佢等亂淨淨，在以色列人面前逃走。
11以色列人對米斯巴出來，一直追非利士人到伯‧甲附近，透路㓾佢等。
12後來，撒母耳在米斯巴㧯善个中間頓一垤石頭，講：「上主到這下一直幫助𠊎等。」所以，佢將這垤石頭安到「以便以謝」。
13恁樣，非利士人被以色列人打輸了。撒母耳還生个時，上主無俾非利士人再侵犯以色列个領土。
14對以革倫到迦特，所有被非利士人搶走个城鎮全部還以色列。以色列收復全部領土。該時，以色列人㧯亞摩利人和平相處。
15撒母耳一生做士師領導以色列。
16佢逐年出去巡查伯特利、吉甲㧯米斯巴，在這兜所在處理以色列人个糾紛。
17出巡以後，佢就轉到家鄉拉瑪，在該位做以色列个士師。佢在拉瑪為上主起一座祭壇。