1無幾久，非利士人召集軍隊攻打以色列人。亞吉對大衛講：「你應該知，你㧯你个部下愛跈𠊎共下去相㓾。」
2大衛講：「當然，𠊎係你个僕人。你自家知𠊎能做麼介。」亞吉對大衛講：「恁樣，𠊎愛你一生人做𠊎个侍衛。」
3撒母耳已經過身；以色列人全部為佢哀傷，將佢葬在佢个故鄉拉瑪。掃羅頭擺識強迫所有仙姑㧯行邪術个離開以色列。
4非利士人个軍隊聚集在書念城附近安營；掃羅召集以色列人在基利波山安營。
5掃羅看到非利士人个軍隊，心肝驚到愊愊掣，
6就求問上主應該樣般做。總係上主無用托夢，又無通過烏陵，乜無通過先知回答佢。
7所以掃羅命令佢个官員講：「代𠊎尋一個仙姑，𠊎愛去問姖。」該兜官員應講：「在隱‧多珥有一個。」
8所以掃羅改變佢个面貌，著別樣个衫，在日頭落山後㧯兩個部下去見該婦人家。掃羅對姖講：「請為𠊎作法，𠊎指定一個死人，你將佢个魂招上來。」
9該婦人家對佢講：「你應該知掃羅所做過个事，佢強迫仙姑㧯行邪術个全部離開以色列。你做麼介愛陷害𠊎，害𠊎無命呢？」
10掃羅對姖發誓講：「𠊎指等永生上主答應你：你做這事，一定毋會受責罰。」
11該婦人家問：「你愛𠊎招麼人上來？」掃羅講：「招撒母耳上來。」
12當婦人家看到撒母耳个時，姖驚到喊起來，對掃羅講：「你做麼介瞞騙𠊎？你就係掃羅啊！」
13王對姖講：「毋使驚！你看到麼介？」婦人家應掃羅講：「𠊎看到一個像神明个人對地底下上來。」
14掃羅問：「佢係麼介樣仔？」婦人家應講：「係一個老人家上來；佢著長衫。」掃羅知該係撒母耳，就恭恭敬敬伏在地上。
15撒母耳問掃羅：「你做麼介吵𠊎？做麼介招𠊎上來？」掃羅講：「𠊎有大災禍了！非利士人愛㧯𠊎相㓾，上帝又已經離開𠊎。佢毋肯再通過先知抑係夢來應𠊎。所以𠊎正請你上來，求你指示𠊎應該樣般做。」
16撒母耳講：「既然上主離開你，做你个對敵，你做麼介還愛求問𠊎？
17上主向你所做个，佢已經通過𠊎个嘴㧯你講過了；上主已經將你个王國搶轉來，賜給別人—就係大衛；
18因為你違背上主个命令，無執行佢對亞瑪力人个憤怒，將佢等㧯佢等所有个一切全部消滅；所以，今晡日上主正恁樣對待你。
19上主一定會將你㧯以色列人交給非利士人。天光日，你㧯你該兜孻仔會來㧯𠊎共下；上主一定會將以色列个軍隊交給非利士人。」
20掃羅被撒母耳个話嚇倒，黏時橫下來，全身直直在地上；因為佢一日一夜無食東西，就無半滴氣力。
21該婦人家到掃羅頭前，看到佢嚇到半死，就對佢講：「你看！你个使女聽你个話，冒生命个危險做你所要求个事。
22這下請你也照使女所要求个做。𠊎為你煮兜東西食，你一定愛食正有氣力向前行！」
23掃羅毋肯；佢講佢無愛食東西。總係佢个部下㧯該婦人家再三勸佢食。最後，佢聽佢等个話，對地上䟘起來，坐在眠床頂。
24該婦人家趕緊將屋下个一隻肥肥个細牛仔㓾掉，又攪麵粉，焙兜仔無酵餅。
25姖將食物㨮到掃羅㧯佢部下面前，佢等就食。該暗晡佢等就離開。