1𠊎這做長老、做基督受苦个見證人、有份將來所愛顯現个榮光，這下勸你等中間共下做長老个。
2你等愛牧養上帝託付你等个羊群，樂意照上帝个旨意照顧佢等，毋係出於勉強；毋係因為貪財，係出於甘心來事奉。
3毋好轄制所託付你等个羊群，反轉愛做佢等个榜樣。
4恁樣，大牧者出現个時節，你等就會領受該永遠毋會失去榮光个冕旒。
5共樣，你等後生个人應該順從長輩。大家愛用謙卑做圍身裙繫等來互相服事；因為聖經講：上帝阻擋驕傲个人，賜恩典給謙卑个人。
6所以，你等愛謙卑，降服在上帝大能个手下，恁樣，佢會在適當个時機高升你等。
7愛將一切个掛慮交給佢，因為佢關心你等。
8愛節制警醒！你等个對敵—魔鬼像吼吼滾个獅仔恁樣行來行去，尋佢吞得落去个人。
9你等愛信心堅定來抵抗佢，因為知，你等在全世界个眾兄弟姊妹也經歷共樣个苦難。
10總係，在你等暫時受苦以後，該賜一切恩典个上帝，就係呼召你等通過同基督耶穌結連來分享佢永遠个榮光个上帝，定著會親自成全你等，堅定你等，賜力量㧯堅固个地基給你等。
11願權能歸給佢，直到永永遠遠！阿愐。
12在忠心个兄弟西拉个幫助之下，𠊎寫這封短短个信仔給你等，來勸勉你等，對你等做見證：這係上帝真實个恩典；你等愛在這個恩典頂高企穩。
13同你等共下得到揀選个巴比倫教會對你等請安；吾孻仔馬可也對你等請安。
14你等愛用愛心相唚彼此請安。願你等所有屬基督个人攏總得到平安！