1共樣，做𡜵娘个，你等也應該順從自家个老公，使無信從真道个老公因為你等个好品行來受感化。你等个話毋使講恁多，
2因為佢等會看到你等純潔㧯端莊个品行。
3你等毋好講究外在个打扮，像愛樣般辮頭那毛，戴金鍊，著靚衫等。
4應當有內在个靚，用毋會褪色个溫柔㧯恬靜來打扮；照上帝看，這係最有價值个。
5因為，頭擺該兜聖潔个婦女，姖等仰望上帝，攏總用順從老公來打扮自家。
6莎拉就係恁樣；姖順從亞伯拉罕，稱佢做「頭家」。你等若行善，無驚東驚西，就係莎拉个妹仔了。
7共樣，做老公个，你等同𡜵娘共下生活，愛體貼姖等係較軟弱个同伴。愛尊重姖等，因為姖等係同你等共下承接上帝所賜个新生命。恁樣，你等个祈禱就毋會受阻礙。
8總講，你等大家愛有共樣个心志㧯心情，像兄弟姊妹恁樣相惜，用慈愛㧯謙卑互相款待。
9毋好用壞報壞，用辱罵還辱罵；顛倒，愛祝福，因為上帝呼召你等个目的係愛給你等承受祝福。
10像聖經所講：麼人想愛享受人生，希望過安樂个日仔，舌乸就毋好講壞話，嘴唇也毋好講花撩。
11愛棄絕邪惡，盡力行善；愛追求和平，煞猛去行。
12因為主看顧義人，留心聽佢等个祈禱；總係該兜作惡个人，主就對佢等變面。
13你等若係熱心行善，麼人會害你等呢？
14你等就係為義受苦，也係盡有福氣啊！毋使驚人个威脅，也毋使憂愁。
15你等个心愛敬畏基督，尊佢做主。愛常常準備好勢，來回答別人个問題，就係關係你等心中个盼望；
16總係愛用溫柔㧯謹慎个態度來回答。愛有清白个良心；恁樣，在你等受侮辱个時節，該兜譭謗你等个人，會因為你等做基督徒所表現个好行為，自家感覺見笑。
17上帝个意思，若係愛你等因為行善來受苦，較贏因為作惡來受苦。
18因為基督識為罪來死，一擺就完成，係義个代不義个，愛帶你等到上帝个面前去。佢个肉體被人處死刑，總係佢个靈還係生生。
19佢通過這個靈識去對監獄肚該兜靈傳道。
20該兜靈係硬頸个靈，就係在挪亞造大船个時，上帝忍耐等待个靈。當時，入大船通過水得到拯救个人毋多，只有八儕。
21這個水所預表个洗禮，這下已經救到你等。洗禮毋係洗淨你等身體个垃圾，係表示你等用淨浰个良心對上帝許願；這洗禮通過耶穌基督个復活拯救你等。
22耶穌基督已經上天頂去，這下坐在上帝个右片；所有个天使並天界个掌權者㧯統治者攏總服從佢。