1有一個神人奉上主个命令對猶大到伯特利去。佢到个時，耶羅波安企在祭壇前燒香。
2神人照上主个命令罵祭壇講：「祭壇啊，祭壇！上主恁樣講：大衛个家族會𫱔一個細孻仔，名安到約西亞。佢會將神廟肚該兜祭司，就係在你這祭壇頂燒香个祭司，在你頂高㓾掉，又在你頂高燒人个骨頭。」
3該日，神人提出一個兆頭，講：「這祭壇會裂掉，頂高个灰會瀉下來。該時，你就知這話係上主通過𠊎講个。」
4耶羅波安王聽到這話就伸手指等神人下令講：「捉起來！」王个手骨黏時毋會挺動，無辦法跔轉來。
5祭壇忽然裂掉，頂高个灰瀉到滿地泥，就像神人奉上主个命令所預言个。
6王遽遽對神人講：「請為𠊎向上主—你个上帝祈禱，求佢醫治𠊎个手骨！」神人向上主祈禱，王个手骨就好轉去，像原旦一樣。
7所以王對神人講：「請㧯𠊎共下轉屋下，食兜東西！𠊎乜愛送禮物答謝你。」
8神人對王講：「就算你將一半个家產給𠊎，𠊎乜毋㧯你去，乜毋㧯你共下啉食；
9因為上主命令𠊎，毋好在伯特利食麼介、啉麼介，也喊𠊎毋好對原來該條路轉去。」
10所以該神人無對佢來伯特利个路轉去；佢對另外一條路轉去。
11該時，有一個老先知住在伯特利。佢該兜孻仔來㧯佢講有關猶大來个神人在伯特利所做个事並佢對耶羅波安王所講个話。
12老先知就問佢等：「佢係對㖠條路轉去？」該兜孻仔就指給佢看猶大來个神人行㖠條路轉去。
13佢喊佢等為佢預備驢仔；佢等照阿爸个話去做。老先知就騎上驢仔，
14向該條路去追猶大來个神人。佢尋到該神人坐在一頭橡樹下，就問佢：「你係對猶大來个神人麼？」該人應講：「係！」
15老先知講：「請㧯𠊎轉屋下食飯！」
16神人講：「𠊎做毋得㧯你共下轉去，也做毋得在這位㧯你共下啉食；
17因為上主識命令𠊎，毋好在伯特利食麼介、啉麼介，也喊𠊎毋好對原來該條路轉去。」
18老先知對佢講：「𠊎也係先知，㧯你共樣。有一位天使奉上主个命令㧯𠊎講，愛𠊎帶你共下轉屋下，請你共下啉食。」其實，這老先知係講花撩。
19所以，神人㧯老先知共下轉去，在厥屋下共下食飯啉水。
20佢等堵堵坐桌个時，上主个話臨到老先知。
21佢就對猶大來个神人喊講：「上主恁樣講：『你毋聽從上主个話，無照上主—你上帝个命令做，
22你樣做得轉來，在𠊎毋准你啉食个地方啉食。所以，你會死掉，你个身屍也毋會葬在你家族个墳墓肚。』」
23佢等食啉以後，老先知為猶大來个神人預備驢仔，
24佢就上路。在路上有一隻獅仔堵到佢，將佢咬死掉，身屍橫在路上；驢仔㧯獅仔企在身屍堘頭。
25有人對該位經過，看到身屍橫在路上，獅仔企在堘頭，就到伯特利去，將所看到个事傳出去。
26老先知聽到，就講：「該係毋聽從上主命令个神人；就像上主講過个，上主喊獅仔扯裂佢，咬死佢。」
27所以佢對該兜孻仔講：「為𠊎預備驢仔。」佢等照佢个話去做。
28佢騎上驢仔出門去，看到該神人个身屍橫在路上，驢仔㧯獅仔還企在身屍堘頭。獅仔無食身屍，也無扯裂驢仔。
29所以老先知將神人个身屍搬上驢背，帶轉伯特利，為佢傷心流目汁，也將佢埋葬。
30老先知將身屍葬在自家家族个墳墓肚；佢㧯佢該兜孻仔對等身屍傷心流目汁講：「哀哉，𠊎个兄弟啊！」
31埋葬以後，老先知對該兜孻仔講：「以後𠊎死掉，將𠊎葬在這墳墓肚，將𠊎个身屍放在神人个塍頭。
32佢奉上主命令攻擊伯特利祭壇㧯所有在撒馬利亞城鎮該兜神廟个話一定會實現。」
33這事以後，以色列个王耶羅波安還係毋離開佢邪惡个道路，繼續對普通个家族中選祭司在山岡頂个祭壇事奉。佢隨便封立所有願意做祭司个人做山岡頂祭壇个祭司。
34耶羅波安所犯个罪使佢个王朝衰敗，致到在地上完全滅亡。