1𠊎親愛个子女啊，𠊎寫這兜係愛喊你等莫犯罪；若有人犯罪，𠊎等有一個中保，代𠊎等對天頂个阿爸求情，就係公義个耶穌基督。
2基督犧牲自家，贖𠊎等个罪；這毋單淨係為𠊎等个罪，也係為全人類个罪。
3若係𠊎等遵守上帝个命令，𠊎等就知𠊎等認識佢。
4若有人講「𠊎認識佢」，總係毋遵守佢个命令，這樣个人係講花撩个，真理無在佢底背。
7親愛个朋友啊，𠊎寫給你等个，毋係新个命令，係舊个命令，係你等一開始就領受个。這舊个命令就係你等當時所聽到个道理。
8總係，𠊎寫給你等个，也算係新个命令；這命令个真理在基督身上，也在你等當中顯明出來。因為烏暗漸漸仔消失，真光已經開始顯明了。
9若有人講佢生活在光明中，總係怨恨自家个兄弟姊妹，佢還係在烏暗中。
10惜兄弟姊妹个，就係生活在光明中，佢毋會害自家跌倒犯罪。
11總係，怨恨兄弟姊妹个，就係在烏暗中；佢在烏暗中行，毋知自家愛去㖠位，因為烏暗害佢个目珠青盲了。
12親愛个子女啊，𠊎寫信仔給你等，因為你等个罪已經通過基督个名得到赦免。
13父老啊，𠊎寫信仔給你等，因為你等認識該對太初就已經存在个。青年人啊，𠊎寫信仔給你等，因為你等已經贏過該隻邪惡者。
14親愛个子女啊，𠊎寫信仔給你等，因為你等認識天頂个阿爸。父老啊，𠊎寫信仔給你等，因為你等認識該對太初就已經存在个。青年人啊，𠊎寫信仔給你等，因為你等勇健；上帝个道理在你等个生命中，你等也已經贏過該隻邪惡者。
15莫愛世界，抑係愛屬這世界个東西。人若愛世界，就毋會有敬愛天頂阿爸个心了。
16一切屬世界个事物，可比肉體个情慾、目珠个情慾，㧯今生一切个驕傲，攏總毋係對天頂个阿爸來个，係對世界來个。
17這世界㧯一切屬世界个情慾全部漸漸消失；總係，實行上帝旨意个人會永遠長存。
18親愛个子女啊，世界个末期到了！你等識聽講，敵基督該儕愛來；這下，敵基督个盡多已經出現了，所以𠊎等知末期已經到了。
19這兜人並毋係正經屬𠊎等个，所以離開𠊎等；佢等若係屬𠊎等，就會同𠊎等共下。總係，佢等離開了，可見佢等攏總毋係正經屬𠊎等个。
20你等已經對基督領受聖靈，所以你等攏總認識真理。
21𠊎寫信仔給你等，毋係因為你等毋識真理，係因為你等已經認識了，也知一切个虛假全部毋係對真理來个。
22恁樣，麼人係講花撩个呢？就係否認耶穌係基督該儕人！這種人就係敵基督个；佢拒絕天頂个阿爸，也拒絕佢个孻仔。
23凡拒絕孻仔个，就無阿爸；凡公開承認孻仔个，連阿爸也有了。
24恁樣，你等一定愛謹守當初所聽个道理。你等若謹守當初所聽个道理，你等就會常常生在孻仔㧯阿爸个生命底背。
25這就係基督親自應許給𠊎等个永遠个生命。
26𠊎寫這兜事，係指等該兜想愛欺騙你等个人講个。
27你等呢，基督已經將佢个靈賜給你等。佢个靈若㧯你等同在，就無需要麼人來教你等；因為佢个靈會將一切教你等。佢个靈係真實个，毋係虛假个。所以，你等愛順從聖靈个教示，一直生在基督个生命底背。
28親愛个子女啊，無毋著，你等愛生在佢个生命底背；恁樣，在佢顯現、再來該日，𠊎等就做得大膽無見笑，毋使囥起來。
29你等知基督係公義个；所以，你等應該知，照公義行个人就係上帝所𫱔个。