1關係拜過偶像个食物，𠊎等知，「𠊎等攏總有這方面个智識」。總係，這種智識會害人自高自大；唯有愛心正會造就人。
2人若自認佢知麼介，照所應該知个，佢還係有所毋知。
3總係，人若敬愛上帝，這人就係上帝所認識个。
4恁樣，關係食拜過偶像个食物這個問題，𠊎等知，偶像所代表个係無存在个東西；𠊎等也知，上帝只有一個。
5雖然天上人間也有所謂「神明」个，(有盡多个「神明」㧯「主」)，
6總係對𠊎等來講，只有一個上帝，就係天頂个阿爸—萬物个創造者；𠊎等係為到佢來生存个。還有，只有一個主，就係耶穌基督；萬物係通過佢來造个，𠊎等也係通過佢來生存个。
7總係，毋係每一個人全部有這種个智識。有兜人以前常常拜偶像，到今晡日，逐擺食這種食物還會感覺係食偶像个東西。佢等个良心本來就軟弱，因為食這種食物，就變做垃圾。
8其實，食物並不能改善𠊎等同上帝个關係；毋食無麼介損失，食也無麼介利益。
9愛細膩噢！毋好因為你等自家个自由害信心軟弱个人跌倒。
10若有人在這件事情上良心軟弱，看到你這「智識豐富」个人在宮廟肚坐席，這敢毋係鼓勵佢食拜過偶像个食物嗎？
11恁樣，這軟弱个兄弟姊妹，就係基督為佢死个人，會因為你个「智識」來滅亡了！
12你等恁樣行，得罪兄弟姊妹，傷害佢等軟弱个良心，就係得罪基督。
13所以，若係食物會害𠊎个兄弟姊妹跌倒，𠊎就永遠毋食肉，免得𠊎使佢等跌倒。