1關係募款幫助信徒个事情，𠊎頭擺識吩咐加拉太个各教會，你等也愛照恁樣去做。
2逐禮拜日，你等逐儕愛照自家个收入比例撥出一兜錢，貯起來，毋好等𠊎去到个時臨時正尋錢。
3𠊎去到个時，會派你等所信任个人，給佢等介紹信，喊佢等將你等个捐款帶去耶路撒冷。
4若需要𠊎也去，佢等做得同𠊎共下去。
5𠊎想愛路過馬其頓。𠊎訪問馬其頓以後，就愛去你等該位。
6𠊎可能會在你等該位住一站時間，或者會在該位過冬，然後正繼續𠊎个旅程。恁樣，無論𠊎愛去㖠位，你等做得為𠊎送行。
7𠊎這下無愛單單順路去看你等，即時就離開；主若肯，𠊎希望留下來同你等共下住一站時間。
8總係，𠊎還愛留在以弗所，直到五旬節；
9因為，雖然有盡多人反對，這位个門開盡大，有盡好个機會好工作。
10提摩太若去到你等該位，希望你等好好接待佢，使佢無驚麼介，因為佢同𠊎共樣係為主工作个。
11做毋得有人看輕佢；愛送佢平安上路繼續佢个旅程，俾佢轉到𠊎這位來，因為𠊎這下等佢同眾兄弟共下來。
12講到亞波羅兄弟，𠊎再三鼓勵佢同其他个兄弟共下去訪問你等，總係佢感覺這下去無盡好，有機會佢一定會去。
13你等愛警醒，愛在信仰頂高企在，愛勇敢，愛堅強。
14無論麼介事情，全部愛用愛心去做。
15兄弟姊妹啊，𠊎愛勸話你等。你等知司提法那㧯佢一家人；佢等係亞該亞地方最先成做基督徒个一家，非常熱心服事眾聖徒。
16你等愛聽從這種个人㧯一切煞猛工作个同工。
17司提法那、福徒拿都，㧯亞該古到𠊎這位來，𠊎盡歡喜。佢等堵好補滿你等無在這位个欠缺。
18佢等使𠊎心靈歡喜，就像使你等心靈歡喜一樣。你等愛敬重這種个人。
19亞細亞省个各教會攏總對你等請安；亞居拉㧯百基拉兩公婆，並在佢等屋下个教會，在主底背熱烈對你等請安。
20這位个眾兄弟姊妹也對你等請安。你等愛聖潔相唚彼此請安。
21𠊎—保羅親筆對你等請安。
22若有毋敬愛主个人，佢係應該受咒詛个。主啊，願你來！
23願主耶穌賜恩典給你等！
24願𠊎个痛惜同你等所有屬基督耶穌个人共下。