1大衛王命令逐支族个族長、國家个行政官員、帶領千人㧯百人个軍官、負責王㧯該兜王子財產並頭牲个管理人、宮廷个官員、軍隊个軍官，㧯所有个重要人物全部集合在耶路撒冷。
2大衛王企在佢等面前向佢等講：「𠊎个兄弟，𠊎个百姓啊，請聽！𠊎本來想愛起一座殿放上主个約櫃；這約櫃係上主—𠊎等上帝个腳凳。𠊎已經準備妥當愛起一座聖殿。
3總係上主毋准𠊎為佢起；因為𠊎係一個戰士，流過盡多人个血。
4上主—以色列个上帝揀選𠊎㧯𠊎个後代永遠做以色列个王。佢在以色列中揀選猶大支族，在猶大支族中揀選吾爸个家族，在吾爸个家族特別揀選𠊎，設立𠊎做王，統治全以色列。
5佢賜給𠊎盡多孻仔，在這兜孻仔中揀選所羅門治理以色列—就係上主个國。
6「上主對𠊎講：『愛負責起𠊎个聖殿个人就係你个孻仔所羅門。𠊎已經揀選佢做𠊎个孻仔，𠊎愛做佢个阿爸。
7若係佢像這下恁樣繼續謹慎來遵行𠊎所有个法律命令，𠊎愛永遠堅固佢个國。』
8「這下，𠊎个兄弟，𠊎个百姓啊，在上帝个面前㧯全部以色列人—上主子民个面前，𠊎命令你等愛謹慎遵行上主—𠊎等上帝吩咐个逐件事，使你等做得承受這垤恁靚个土地，做得代代傳下去。」
9大衛對所羅門講：「孻仔啊，你愛認識若爸个上帝，全心樂意事奉佢；因為上主鑒察眾人个心，佢知𠊎等所有个心思㧯願望。你尋求佢，佢就接納你；你遠離佢，佢會永遠豁掉你。
10你愛知，上主已經揀選你來起佢个聖殿。這下你愛勇敢去做。」
11大衛將起聖殿个計劃全部㧯所羅門講，像聖殿所有个建築、倉庫、樓房、內殿，㧯至聖所—就係贖罪个地方。
12佢也將心肚所想个圖形全部㧯所羅門講，像庭院、四周圍个房屋、貯存聖殿个東西㧯獻給上主禮物个倉庫。
13大衛又㧯佢講樣般組織祭司㧯利未人，使佢等實行職務，擔任上主聖殿个工作，管理聖殿所有个東西。
14佢又指示應該用幾多金仔來製造金器，用幾多銀仔來製造銀器，
15用幾多金仔來製造金燈臺㧯臺頂个金燈，用幾多銀仔來製造銀燈臺㧯臺頂个銀燈；
16用幾多金仔來製造放供餅獻給上帝个金桌仔，用幾多銀仔來製造銀桌仔。
17佢也指示應該用幾多純金製造叉仔、盤仔、杯仔、金碗，用幾多銀仔製造銀碗，
18用幾多純金製造燒香个壇㧯安基路伯个固定座—外形像車仔；這兩隻金基路伯个翼胛揜等上主个約櫃。
19大衛講：「這所有个工作計劃係照上主親自給𠊎个指示寫个。」
20大衛對厥孻仔所羅門講：「你愛堅強勇敢，愛有信心去做！毋使驚，也毋好灰心失志。𠊎所事奉个主上帝㧯你同在；佢毋會離開你，也毋會㧒掉你，直到你完成上主聖殿个工作。
21祭司㧯利未人受派在上帝聖殿擔任職務。各種手藝高明个師傅全部歡喜幫助你；人民㧯民間个領袖全部聽你个命令。」