1撒但想愛害以色列人，刺激大衛來辦理戶口調查。
2大衛就命令軍隊个元帥約押㧯其他官員講：「你等愛到以色列逐所在，對最南片个別是巴到最北片个但，點算人民；轉來㧯𠊎報告，𠊎愛知人民个數目。」
3總係約押應講：「願上主使以色列个人民比這下个人數多一百倍！吾主吾王，佢等全部敢毋係你个僕人？你做麼介強強愛做這事？做麼介愛害全民犯罪呢？」
4總係王堅持愛約押服從佢个命令。所以約押出去，全以色列國行到透透，然後轉到耶路撒冷。
5約押向大衛報告：以色列帶武器个壯丁有一百一十萬人；猶大帶武器个壯丁有四十七萬人。
6約押無調查利未支族㧯便雅憫支族个人數，因為佢當惱王這個命令。
7上帝也無歡喜這點算人民个事，所以佢責罰以色列。
8大衛對上帝講：「𠊎做這事犯大罪了！求你赦免僕人个過失！𠊎个行為實在當戇。」
9上主對大衛个先見迦得講：
10「去㧯大衛講，𠊎用三個災難給佢選一個，佢選麼介，𠊎就做麼介。」
11迦得去見大衛，將上主講个話㧯佢講，又問大衛：「你愛選㖠樣？
12三年个飢荒呢？抑係三個月被敵軍逐？抑係俾上主用佢个劍施行攻擊，使你个國家發三日个瘟仔，上主派天使在以色列逐所在造成死亡呢？想看仔，愛𠊎樣般回答上主。」
13大衛對迦得講：「𠊎當為難！𠊎無愛被人處罰。𠊎甘願俾上主自家責罰𠊎，因為上主有豐盛个憐憫。」
14所以，上主降瘟仔在以色列人身上，就有七萬人死掉。
15上帝又派天使去毀滅耶路撒冷，總係天使愛執行个時，上主改變佢責罰人民个心意，就對該執行毀滅个天使講：「手停下來，罅了！」該時，上主个天使在耶布斯人亞勞拿个打麥場。
16大衛看到上主个天使企在半空中，手項擎等劍，愛毀滅耶路撒冷。大衛㧯該兜長老全部著麻衫，伏在地上跪拜。
17大衛祈禱講：「上帝啊，𠊎正係該犯罪、做毋著事个人，係𠊎下令調查戶口个。這兜人民像羊仔，佢等乜無做麼介。上主—𠊎个上帝啊，求你責罰𠊎㧯𠊎屋下人，毋好降瘟仔給你个子民。」
18所以，上主个天使㧯迦得講，喊佢命令大衛到耶布斯人亞勞拿个打麥場去，為上主起一座祭壇。
19大衛照迦得奉上主命令所講个話上去。
20亞勞拿㧯佢四個孻仔堵好在打麥場打麥；佢等一看到天使，該四個孻仔全部走去囥起來。
21亞勞拿看到大衛向佢這片行過來，就離開打麥場，行前伏在地上跪拜。
22大衛對亞勞拿講：「請你將打麥場賣給𠊎，𠊎好為上主起一座祭壇，俾發瘟停下來，𠊎會照價錢付給你。」
23亞勞拿講：「吾主吾王，做你拿去！你合意麼介就做麼介。這位有牛好做燒化祭，又有打麥个枋仔好做柴燒，還有麥仔好做素祭。𠊎將這兜全部送給你。」
24總係大衛王對亞勞拿講：「做毋得！𠊎一定愛照罅額个價錢㧯你買；𠊎無愛向上主獻你个東西，無愛獻白白得來个做燒化祭。」
25所以大衛用六百隻金幣向亞勞拿買打麥場。
26大衛在該位為上主起一座祭壇，獻燒化祭㧯平安祭。大衛祈禱上主；上主就聽佢个祈求，對天頂降火下來，將祭壇頂个頭牲燒掉。
27上主吩咐天使，天使就將劍收起來。
28大衛看上主在耶布斯人亞勞拿打麥場聽佢个祈禱，所以就在該位獻祭。
29摩西在曠野所造上主个聖帳篷㧯獻燒化祭个祭壇該時還在基遍敬拜个所在。
30總係大衛毋敢到該位去求問上帝，因為佢驚上主天使个劍。