1佢等將上帝个約櫃扛下來，放在大衛預備好个帳篷肚，然後向上帝獻燒化祭㧯平安祭。
2大衛獻祭以後，就奉上主个名祝福人民，
3又將食物分給佢等。以色列人，無論男女，逐儕得到一垤餅，一垤肉㧯一垤葡萄餅。
4大衛指派幾個利未人在上主个約櫃頭前事奉，頌讚敬拜上主—以色列个上帝。
5亞薩係隊長，撒迦利雅係副隊長。雅薛、示米拉末、耶歇、瑪他提雅、以利押、比拿雅、俄別‧以東、㧯耶利彈豎琴。亞薩打鑇仔。
6兩個祭司—比拿雅㧯雅哈悉照時在上帝个約櫃頭前歕喇叭。
7該日，大衛第一擺指派亞薩㧯佢个利未同胞負責唱歌來讚美上主。
8你等愛感謝上主，求喊佢个名；愛向萬國傳揚佢个作為！
9你等愛唱歌來頌讚佢！愛講說佢奇妙个作為！
10你等愛因為佢个聖名快樂！願一切尋求上主个人歡喜！
11愛求上主幫助；愛時常敬拜佢。
14佢係上主—𠊎等个上帝；佢个審判傳遍全世界。
15你等愛永遠紀念佢个約，佢所講个應許直到千代。
16佢記得同亞伯拉罕所立个約，還有佢發誓賜給以撒个應許。
17上主同雅各堅定這約做條例，就係佢給以色列永久个契約。
18佢講：「𠊎愛將迦南地賜給你，全部愛做你等个產業。」
19該時，你等人丁有限，數目盡少，在迦南地暫時住。
20佢等對這族漂流到該族，對這國流浪到該國。
21總係上帝不准外人欺負佢等；為到佢等，佢警告外族該兜王。
22佢講：「做毋得為難𠊎所揀選个；你等做毋得傷害𠊎个先知！」
23全世界都愛來歌頌上主！愛逐日傳揚佢拯救个福音！
24愛對萬國宣傳佢个榮光！愛對萬民講起佢偉大个作為！
25上主係最偉大个，應當受最大个讚美；佢應當比所有个神明得到較多个敬畏。
26列國所有个神明不過係偶像；總係創造諸天个就係上主。
27榮光、威嚴在佢个面前；大能、喜樂充滿佢个聖所。
28地上个萬族啊，應當頌讚上主！你等愛頌讚佢个榮光㧯大能！
29愛頌讚上主榮光个名；愛帶祭物來到佢面前。愛用聖潔个打扮來跪拜上主；
30全地愛在佢个面前愊愊掣！大地堅固，毋會搖動。
31諸天愛歡喜，大地愛快樂！愛向萬國宣佈：「上主掌權！」
32海㧯其中个生物啊，愛大聲歡呼！田園㧯其中个出產啊，愛歡喜起來！
33該時，樹林中个樹木愛在上主面前歡喜唱歌，因為佢愛來治理天下。
34愛感謝上主，因為佢係至善；佢个慈愛永遠長存！
35愛向佢講：「上帝𠊎等个救主啊，求你拯救𠊎等！求你將𠊎等對列國聚集起來，使𠊎等有好頌讚你个聖名，用感謝你來做𠊎等个榮光。」
36願上主—以色列个上帝受稱頌，對永遠到永遠！接等人民同聲應講：「阿愐！」佢等全部頌讚上主。
37大衛王派亞薩㧯佢个同胞利未人在約櫃頭前事奉上主。佢等愛日日在該位服事。
38耶杜頓个孻仔俄別‧以東㧯佢本族有六十八人被人派去協助佢等。何薩㧯俄別‧以東係掌門个隊長。
39總係，祭司撒督㧯其他个祭司在基遍个山頭、上主个聖帳篷頭前事奉佢。
40逐日早暗，佢等愛照上主給以色列人个法律書上所寫个，在祭壇頂獻燒化祭。
41㧯佢等共下个有希幔、耶杜頓㧯有兜其他个人；佢等特別受選出來，向上主歌唱，頌讚佢个慈愛永遠長存。
42希幔㧯耶杜頓也負責喇叭、鑇仔㧯其他樂器；這兜全部係讚美上帝个樂器。耶杜頓个子孫負責掌門。
43後來所有个人民全部轉屋下去；大衛也轉去為全家祝福。