1泰爾王希蘭派使者到大衛該位去，帶等香柏樹、打石師傅㧯木匠，愛代佢起王宮。
2大衛就知上主設立佢做以色列王个事已經完成了，也知上主係因為自家个子民使佢个王國興旺。
3大衛在耶路撒冷又討盡多細姐，𫱔盡多子女；
4在耶路撒冷𫱔个有：沙母亞、朔罷、拿單、所羅門、
5益轄、以利書亞、以法列、
6挪迦、尼斐、雅非亞、
7以利沙瑪、比利雅大、以利法列。
8非利士人聽到大衛已經被人膏油立做全以色列个王，就派大軍隊來尋大衛。大衛一聽講，就帶兵去出戰。
9非利士人來到利乏音山壢，攻入該地方。
10大衛求問上帝：「𠊎應該去攻打非利士人麼？你會使𠊎打贏麼？」上主應講：「去！𠊎會將佢等交在你手中。」
11所以，大衛上巴力‧比拉心去，在該位打贏非利士人。大衛講：「上帝用𠊎衝散𠊎个仇敵，像大水沖壞石壆。」所以該地方喊做巴力‧比拉心。
12非利士人逃命个時將佢等个神像㧒在該位，大衛命令人將該兜神像燒掉。
13無幾久，非利士人又倒轉來攻入利乏音山壢。
14大衛又求問上帝；上帝講：「毋好對這位攻打佢等，愛𫟧到佢等後背，對桑仔樹樹林該片來攻打。
15你一聽到桑仔樹尾頂有腳步聲，就遽遽進攻，因為𠊎—上帝已經行到你頭前去攻打非利士人个軍隊。」
16大衛就照上帝个命令去做。結果，佢將非利士人打退，對基遍逐到基色。
17所以大衛个名聲傳到遠遠；上主使逐國全部驚佢。