1 Samuel 25
1 撒母耳死掉；所有个以色列人聚集為佢哀傷，然後將佢葬在佢个故鄉拉瑪。這事以後，大衛下去巴蘭个曠野。
4 大衛在曠野聽到拿霸堵好在迦密剪羊毛，
5 就派十個後生人到迦密尋拿霸，向佢問安。
6 大衛喊佢等代佢向拿霸請安講：「願你長壽！全家健康！所有屬你个也平安順利！
7 𠊎聽講你在這位剪羊毛；你个牧人一直㧯𠊎等共下，𠊎等無欺負佢等，佢等在迦密个時，無跌掉麼介東西。
8 你問佢等，佢等會㧯你講。在這過節个時𠊎等到你這位來，所以拜託你好好款待𠊎个僕人。看做得拿兜東西給佢等麼？也給兜𠊎—你親愛个朋友大衛。」
9 大衛个部下來到，提大衛个名㧯拿霸講這兜好話，等佢回答。
10 拿霸應講：「大衛係麼人？耶西个孻仔係麼人？最近有當多奴才悖逆佢等个主人逃到這位來，
11 𠊎無愛隨便將𠊎个餅、水㧯為𠊎剪羊毛个人預備个肉，給該兜𠊎毋知對㖠位來个人！」
12 大衛个部下倒轉去，將拿霸所講个話向大衛報告。
13 大衛就下令：「帶等刀仔！」佢等就照恁樣做。大衛自家也帶等刀仔，𢱋四百個部下出發，留下兩百儕看守補給品。
14 拿霸个一個僕人對拿霸个𡜵娘愛比該講：「大衛派人對曠野來向𠊎等个主人請安，總係𠊎等个主人侮辱佢等。
15 佢等實在對𠊎等當好，從來毋識欺負𠊎等。𠊎等㧯佢等共下在曠野个時，𠊎等也毋識跌掉麼介東西。
16 𠊎等掌羊仔个時，全部㧯佢等共下，佢等日夜保護𠊎等。
17 請你想看仔你應該樣般做？這事可能會成做𠊎等主人㧯全家个災難。𠊎等个主人當惡，麼人个話佢全毋聽！」
18 愛比該趕緊預備好兩百垤餅、兩皮袋酒、五隻焙好个羊、十七公斤焙熟个麥仔、一百垤葡萄餅、兩百垤無花果餅，全部疊在幾隻驢仔个背囊頂，
19 然後姖對僕人講：「你等在頭前行，𠊎在後背跈。」總係姖無將這事㧯厥老公拿霸講。
20 愛比該騎等驢仔，正跈等山路下來个時，忽然看到大衛㧯佢个部下在對面行下來。
21 大衛本來想：「𠊎做麼介愛在這曠野保護該人个財產，使佢無跌掉麼介東西。𠊎恁樣㧯佢𢯭手，佢卻用惡報善！
22 天光以前，若係𠊎毋將佢所有个細孻仔㓾淨淨，願上帝嚴嚴來責罰𠊎！」
23 愛比該一看到大衛，趕緊對驢仔个背囊頂下來，伏在地上跪拜，
24 在大衛腳前講：「大人啊，這罪過俾𠊎一儕來㧡！求你俾你个使女對你講話，求你甘願聽使女个說明。
25 大人啊，請毋好插拿霸該隻壞東西；佢个性情㧯佢个名共樣，佢安到拿霸，佢做人就係戇仔。論到𠊎，大人所派來个僕人到个時，你个使女無在該位。
26 大人啊，既然上主無愛你親手向敵人報仇，流佢等个血，這下𠊎指等永生个上主，又敢在你面前發誓：願你个敵人㧯所有想害你个人，全部像拿霸一樣受責罰。
27 求大人收使女帶來个禮物，分給你个部下。
28 也求你赦免使女个毋著。上主一定會使你做王，你个後代也會做王，因為大人係為上主相㓾。你一生人毋會做麼介毋著个事。
29 有人想愛攻擊你，㓾你，上主—你个上帝會保守你，就像人保護珍貴个寶物。你个敵人，上主會豁掉佢等，就像人用拂石仔个索仔將石仔拂到遠遠去共樣。
30 大人啊，上主照佢个應許為你成就一切好事、使你做以色列王个時節，
31 你就毋會因為無故㓾人抑係親手報仇感覺良心不安。上主賜福給你个時節，求你毋好毋記得你个使女。」
32 大衛對愛比該講：「上主—以色列个上帝係應當稱頌个！因為佢今晡日派你來見𠊎！
33 𠊎為你个見識㧯你今晡日所做个一切感謝上主，因為你使𠊎毋使親手報仇、流人个血。
34 𠊎指等該使𠊎毋使傷害你个上主—以色列永生个上帝老實講，若毋係你趕來見𠊎，拿霸屋下所有个細孻仔在天光以前全部會死淨淨！」
35 所以大衛收下愛比該帶來个禮物，並對姖講：「安心轉去。𠊎會照你講个去做。」
36 愛比該轉到拿霸該位，看到拿霸在屋下享受筵席，就像王个筵席。拿霸心情爽快，食到當醉，所以愛比該該暗晡無㧯佢講所發生个事，
37 等到第二朝晨拿霸清醒正㧯佢講。拿霸黏時心臟病發作，完全毋知人事。
38 十日後，上主擊打拿霸，佢就死掉。
39 大衛聽講拿霸死掉，就講：「讚美上主！佢為𠊎報拿霸侮辱𠊎个冤仇，又使𠊎—佢个僕人無做毋著事。上主因拿霸个壞行為責罰佢。」過無幾久，大衛派人去㧯愛比該講，愛討姖做𡜵娘。
40 大衛个僕人到迦密見愛比該，對姖講：「大衛派𠊎等來你這位，佢想愛討你做𡜵娘。」
41 愛比該就伏在地上，講：「𠊎甘願做佢个使女，洗𠊎主人該兜僕人个腳。」
42 愛比該黏時䟘起來，騎上姖个驢仔，帶等五個使女，㧯大衛个僕人共下去。愛比該就做大衛个𡜵娘。
43 大衛已經討耶斯列人亞希暖，所以姖兩儕都做佢个𡜵娘。
44 以前做大衛个𡜵娘、掃羅个妹仔米甲，掃羅早就將姖嫁給迦琳人拉億个孻仔帕提做𡜵娘。