Bible

1 大衛到挪伯城、到祭司亞希米勒該位。亞希米勒當緊張出來見佢，講：「你做麼介一儕到𠊎這位來？樣般無人跈你來？」 2 大衛應祭司亞希米勒講：「係王命令𠊎到你這位來个。王㧯𠊎講，毋好俾人知佢派𠊎來這位做麼介。𠊎个部下，𠊎已經吩咐佢等到某某所在見𠊎。 3 這下，你有麼介好食？請給𠊎五隻餅，抑係別个食物。」 4 祭司應大衛講：「𠊎無普通个餅，只有聖餅。若係你个部下最近無親近過婦人家就做得拿去。」 5 大衛應祭司講：「事實上，就算平常出任務，𠊎等全部做毋得親近婦人家，該兜後生人个身體定著愛保持淨浰，何況今晡日有特殊个任務，敢毋會還較愛保持淨浰！」 6 所以，祭司將聖餅拿給大衛；因為佢只有獻給上主个聖餅，係對聖桌頂正換下來个。 7 (為掃羅畜頭牲个總管，以東人多益，該日堵好在場，因為禮儀上个關係留在上主面前。) 8 大衛對亞希米勒講：「你這位有槍抑係刀仔麼？王个命令當急，𠊎就趕緊出門，無時間去拿𠊎个刀仔抑係其他个武器。」 9 祭司應講：「𠊎這位有一支刀仔，你在以拉山壢㓾死个非利士人歌利亞，佢該支刀仔這下放在以弗得後背，用布包等。你若愛，就拿去。該支刀仔係這位惟一个武器。」大衛講：「請交給𠊎！無比這支較好个刀仔！」 10 所以，大衛離開該位，來閃開掃羅，逃到迦特王亞吉該位去。 11 亞吉个官員對佢講：「這敢毋係大衛、以色列國个王嗎？該兜婦女跳舞个時唱講：『掃羅㓾死千千，大衛㓾死萬萬』。敢毋係這個大衛嗎？」 12 大衛聽到佢等講个話，盡驚迦特王亞吉， 13 所以就在佢等面前詐癲。佢就在城門亂寫、亂畫，由在口潾流到鬍鬚。 14 亞吉對佢个官員講：「看哪！這個人係癲仔！做麼介帶佢到𠊎面前來？ 15 敢講𠊎這位欠癲仔係麼？你等樣般帶這隻癲仔來𠊎這位，在𠊎屋肚癲癲狂狂，惹𠊎受氣？」