1 Kings 9
1 所羅門王起上主个聖殿、王宮㧯佢所愛起个其他房屋以後，
2 上主再一擺向佢顯現，像以前在基遍向佢顯現共樣。
3 上主對佢講：「𠊎已經聽你个祈禱。𠊎將你起个這聖殿分別為聖，成做永遠敬拜𠊎个地方；𠊎會常常在這位看顧它，關心它。
4 若係你像若爸大衛共樣誠心誠意來服事𠊎，遵守𠊎个法律，照𠊎个命令去做，
5 𠊎一定會堅固你以色列个王位，照𠊎向若爸大衛所應許个，俾厥後代个王位毋會斷掉，會永遠統治以色列。
6 若係你等㧯你等个後代斡頭離開𠊎，毋遵守𠊎給你等个法律㧯誡命，去敬拜別个神，
7 𠊎會將𠊎个子民以色列對𠊎賜給佢等个土地上豁出去，又㧒掉這座𠊎識分別為聖、成做敬拜𠊎个聖殿。萬民會恥笑以色列，看輕佢等。
8 這聖殿將來會成做荒埔；過路人全部會著驚、嘲謔講：『上主做麼介恁樣款待這國㧯這聖殿呢？』
9 人會應講：『因為佢等離開上主—佢等个上帝。上主識𢱋佢等个祖先對埃及出來，佢等反轉去親近、服事、敬拜別个神明，所以上主降這一切災難給佢等。』」
10 所羅門用二十年个時間起上主个聖殿㧯王宮。
11 泰爾个王希蘭供給所羅門所需要个香柏樹、松樹㧯工程需要个金仔。完工以後，所羅門王就將加利利地區个二十座城給希蘭。
12 希蘭對泰爾來看所羅門給佢該兜城，當毋滿意，
13 就對所羅門講：「兄弟啊，你給𠊎个這兜城市算麼介？」所以該地區到今晡日還係喊做迦步勒。
14 希蘭給所羅門个金仔大約有四千公斤。
15 所羅門王喊工人來起聖殿㧯王宮，又坉平城東个低窩地，起耶路撒冷城牆。佢也用這兜工人重建夏瑣、米吉多、㧯基色該兜城。
16 (以前埃及王來攻打基色，佔領它，將城內个迦南人㓾掉，又放火燒城。後來，厥妹仔嫁給所羅門个時，佢就將這城做嫁妝送給厥妹仔。
17 所羅門就重建基色。)佢又起下伯‧和崙、
18 巴拉、猶大曠野个達莫、
19 囤貨物个城市、放戰車㧯戰馬个城市，並完成在耶路撒冷、黎巴嫩㧯國內所有地方佢所愛做个工程。
22 所羅門無使以色列人做奴才，只有喊佢等做戰士、官長、將軍、軍長、戰車長㧯騎兵。
23 所羅門有五百五十個監工，監督工人做各種建築工程。
24 所羅門个𡜵娘—埃及王个妹仔，對大衛城搬到所羅門為姖新起个王宮以後，所羅門將城東个低窩地坉平。
25 所羅門一年三擺在佢為上主起个祭壇頂獻燒化祭㧯平安祭。佢也向上主燒香。恁樣，佢完成起聖殿个工程。
26 所羅門王又在以東地區紅海滣頭偎近以祿个以旬‧迦別造了大船，編成船隊。
27 希蘭王派佢有經驗个船員出去，㧯所羅門个部下共下行船。
28 佢等行船到俄斐，對該位得到大約一萬四千公斤个金仔，就運轉來給所羅門王。