1 Kings 14
1 該時，耶羅波安个孻仔亞比雅發病。
2 耶羅波安對厥𡜵娘講：「你改裝一下，俾別人認毋出你係耶羅波安个𡜵娘，然後到示羅去。先知亞希雅住在該位；佢識講𠊎會做以色列人个王。
3 你愛帶給佢十垤餅，一些仔薄餅，㧯一罐蜂糖。佢會㧯你講，𠊎等个孻仔會樣般。」
4 所以，耶羅波安个𡜵娘到示羅、亞希雅个屋下去。亞希雅已經年老，目珠看毋到。
5 上主先㧯佢講，耶羅波安个𡜵娘會因為孻仔發病來求問佢；上主也指示佢應該講个話。耶羅波安个𡜵娘到个時，姖改裝變像另外一個人。
6 總係亞希雅聽到姖个腳步聲到門口，就講：「耶羅波安个𡜵娘，落來啊！你做麼介愛改裝做另外一個人呢？𠊎奉命將壞消息㧯你講。
7 去㧯耶羅波安講，上主—以色列个上帝恁樣講：『𠊎對人民中揀選你，設立你做𠊎以色列子民个統治者。
8 𠊎對大衛个後代將國權搶過來賜給你；總係你無像𠊎僕人大衛恁樣一心一意對𠊎忠心，聽從𠊎个命令，單淨做𠊎看做著个事。
9 你比你以前个統治者犯還較大个罪。你違背𠊎，為自家設立別个神，又鑄造偶像來拜，惹𠊎發譴。
10 所以，耶羅波安啊，𠊎愛降災禍給你个家族；𠊎愛將所有屬你个男人，無論自由身个抑係無自由身个，全部對以色列中㓾淨淨。𠊎愛除滅你个家族，就像人將垃圾掃掉一樣。
11 你屋下所有个人，死在城肚个一定會被狗仔食掉，死在山野个一定會被鳥仔食掉。𠊎係上主；這係𠊎所講个。』」
12 亞希雅繼續對耶羅波安个𡜵娘講：「你好轉屋下去了！你一入城，你个孻仔就會死掉。
13 以色列全國个人民會為佢傷心流目汁，將佢埋葬。佢係耶羅波安家族當中惟一有人埋葬个，因為只有佢係上主—以色列个上帝所歡喜个。
14 上主愛設立一個王統治以色列；這王會結束耶羅波安个王朝，其實這下就係該時節了！
15 上主愛責罰以色列，搖動它，像細河壩肚个蘆竹搖來搖去。佢愛將以色列人民對佢賜給佢等祖先這垤當好个土地上挷起來，將佢等分散到幼發拉底河該片去，因為佢等製造亞舍拉女神个像，惹上主發譴。
16 上主愛㧒掉以色列；因為耶羅波安犯罪，也使以色列人民陷在罪惡當中。」
17 耶羅波安个𡜵娘轉到得撒，一入家門，細人仔就死掉。
18 以色列人民為這細人仔傷心流目汁，將佢埋葬，就像上主通過佢个僕人先知亞希雅所講个。
19 耶羅波安其他个事，佢樣般相㓾㧯統治，全部記在《以色列列王史》底背。
20 耶羅波安做王二十二年，然後死掉。佢个孻仔拿答承接佢做王。
21 所羅門个孻仔羅波安做猶大王个時，係四十一歲。佢在耶路撒冷統治十七年；這城係上主對以色列逐支族當中選出來做敬拜佢个地方。羅波安个阿姆名安到拿瑪，係亞捫人。
22 猶大个人民行上主看做邪惡个事，比佢等个祖先所做个還較惹佢發譴。
23 佢等在逐座山岡頂㧯逐頭大樹下為假神起神廟，又頓石柱㧯亞舍拉女神像來拜。
24 最可惡个係在國內个神廟有男娼。猶大人民做這一切可惡个事，就像以色列人入去這地以前該兜被上主逐走个外族人所做个。
25 羅波安在位个第五年，埃及王示撒來攻打耶路撒冷。
26 佢將上主个聖殿㧯王宮所有个寶物全部搶走，包含所羅門製造个金盾牌。
27 羅波安王為到補這兜金盾牌，就造銅盾牌，將它兜交給看守王宮大門个守衛長管理。
28 王逐擺到聖殿去个時，守衛就拿等這兜盾牌，事後又放轉守衛室。
29 羅波安其他个事全部記在《猶大列王史》底背。
30 這站期間，羅波安㧯耶羅波安常常戰爭。
31 羅波安死掉，葬在大衛城个王室墳墓肚。厥姆安到拿瑪，係亞捫人；厥孻仔亞比雅承接佢做王。