Zechariah 14
1 上主審判个日仔會到了，該時耶路撒冷會被人搶；人會在你等面前分搶來个東西。
2 上主愛聚集所有个國家㧯耶路撒冷相㓾。這城會被人攻破，房屋會被人搶，婦女會被人強姦；城肚一半个人會被人捉走，賸下來个會留在城肚。
3 然後，上主愛出去㧯該兜國家相㓾，像佢以前恁樣。
4 該日，佢个腳愛企在耶路撒冷東片个橄欖山頂。橄欖山會在中央裂開，對東到西成做大山壢，山个一半向北徙，另外一半向南徙。
5 你等愛對上主个山壢逃走，因為這山壢直透到亞薩。你等會逃走，像你等个祖先在猶大王烏西雅个時逃閃大地動恁樣。然後上主—𠊎个上帝愛降臨，帶等所有个聖者共下來。
6 該日，毋會再有光、寒冷、落霜，
7 也無烏暗；無分日時頭，也無分暗晡頭，就算暗晡時還會有光明。這日仔只有上主正知。
8 在該日，會有生命水對耶路撒冷流出來，一半流入死海，一半流入地中海；連較燥旱个熱天抑係冬天，還係共樣有這水。
9 上主一定會做全世界个王。該日，儕儕攏總愛承認佢係獨一無二个上主；佢个名也係獨一無二个。
10 對北片个迦巴到耶路撒冷南片个臨門，全地區愛變做平地。耶路撒冷會比周圍个地較高；城會對便雅憫門直透到角門(這地方以前有一個舊門)，對哈楠業樓到王个酒窟。
11 人民會安居樂業住在耶路撒冷，毋會再有被人滅亡个危險。
12 上主愛使該兜㧯耶路撒冷相㓾个國家人民發瘟。佢等企等好好个時，肉就糜掉，目珠仁塌掉，舌乸也爛掉。
13 在該日，上主愛使佢等大亂、大著驚；儕儕揪來揪去、打來打去。
14 猶大人愛為耶路撒冷爭戰；佢等會搶走四圍各國个財寶，有當多个金仔、銀仔㧯衫褲。
15 列國个馬仔、騾仔、駱駝、驢仔㧯營地所有个動物，也全部會發瘟。
16 後來，所有來攻打耶路撒冷个列國，還生个人年年愛上來敬拜大君王—上主、萬軍个元帥，並守搭寮仔節。
17 地上萬族中若係有毋上來耶路撒冷敬拜大君王—上主、萬軍个元帥个，雨水就毋會落在佢等个土地上。
18 若係埃及人毋上來，雨水也毋會落在該地上，反轉會發瘟，因為上主愛攻擊該兜無來守搭寮仔節个列國。
19 這就係埃及㧯所有毋上來守搭寮仔節个國家愛受个責罰。
20 在該日，連馬仔个玲琅會刻等『歸上主為聖』這句話。聖殿肚个鑊頭也會像祭壇前个碗共樣係聖个。
21 所有在耶路撒冷㧯猶大个鑊頭，全部愛歸上主—萬軍个元帥為聖。獻祭个人攏總愛用這鑊頭來煮祭肉。在該日，上主—萬軍元帥个聖殿肚，毋會再有做生理个人。