Romans 5
1 既然𠊎等因為信被上帝稱做義人，就通過𠊎等个主耶穌基督㧯上帝有和好个關係。
2 𠊎等又通過基督，因為信，進入這下所享受上帝个恩典；因為恁樣，𠊎等歡歡喜喜盼望分享上帝个榮光！
3 就係在患難中，𠊎等還係歡喜；因為𠊎等知，患難會養成忍耐，
4 忍耐會生出老練，老練會帶來盼望。
5 這盼望毋會使𠊎等失望；因為上帝通過佢賜給𠊎等个聖靈，將佢个痛惜倒在𠊎等个心中。
6 當𠊎等還軟弱个時，基督就照上帝所定个日仔為罪人死。
7 為義人死就盡難得；為好人死，或者有人敢做。
8 唯獨上帝對𠊎等表明佢講毋盡个痛惜：在𠊎等還做罪人个時，基督就已經為𠊎等死！
9 因為佢流血來死，𠊎等這下就同上帝有正確个關係；將來，佢過較愛救𠊎等脫離上帝个發譴。
10 𠊎等原來係上帝个仇敵；總係通過厥孻仔个死，佢使𠊎等成做佢个朋友。既然成做佢个朋友，𠊎等還較愛通過基督个生命來得救！
11 毋單淨恁樣，既然主耶穌基督使𠊎等這下就做上帝个朋友，𠊎等就通過佢歡歡喜喜來榮光上帝。
12 罪通過一個人來入世界，因為恁樣，死也通過罪跈等來；結果，死就臨到全人類，因為每一個人攏總犯了罪。
13 在法律頒佈以前，世界就有罪个存在；總係，無法律，人就無照法律个標準來接受刑罰。
14 雖然恁樣，對亞當到摩西，人類還係被死管轄，就算無像亞當恁樣犯到毋服從上帝个罪，人還係無法度閃開死个權勢。亞當係以後正愛來該儕个預表。
15 總係，兩儕並毋係完全共樣，因為上帝白白个恩賜㧯亞當个罪係大有分別个。雖然有盡多人因為亞當一儕个罪來死；總係，上帝个恩典大加盡多。佢通過耶穌基督一儕白白賜給眾人个恩賜也係恁樣。
16 上帝个恩賜㧯一個人犯罪个結果有盡大个差別。因為一個人犯罪，就帶來「有罪」个判決；總係，多多人犯罪，卻得到「無罪」个宣告，這就係堪毋得个恩賜！
17 雖然因為一個人犯罪，死就管轄世間人，總係耶穌基督一儕所成就个還較大！所有領受上帝豐盛个恩典、白白得到稱義个人，攏總會通過基督得到生命來掌權。
18 總講，因為一個人犯罪，眾人就全部受定罪；共樣，因為一個人所行个義，眾人就攏總得到宣告無罪來承受生命。
19 因為一個人違悖命令，眾人就成做罪人；像恁樣，一個人順服，眾人就成做義人。
20 法律一制定，過犯就增加；總係罪越多，上帝个恩典也越豐盛。
21 罪係通過死來管轄，像恁樣，上帝个恩典係通過公義來統治，愛使𠊎等通過𠊎等个主耶穌基督來得到永生。