Romans 2
1 朋友啊，論斷人个，無論你係麼人，毋使想愛推辭。你論斷別人，總係自家所做个又同佢等共樣，恁樣，你就係定自家个罪。
2 𠊎等知，行這種事情个人，上帝會照公當審判佢等。
3 總係，朋友啊，你所論斷个，別人所行个該兜事情，就係你所行个啊！你想，你閃得開上帝个審判嗎？
4 抑係你看輕佢豐盛个慈愛、寬容㧯忍耐？你應該知上帝个慈愛，因為佢愛你悔改！
5 總係你个硬心㧯毋肯悔改，為你自家招來更多个憤怒，致到上帝為公義發譴㧯審判个日仔來到个時，受還較重个責罰。
6 因為上帝愛照逐儕个行為報應佢。
7 有兜人堅持行善，追求對上帝來个尊貴、榮光，㧯毋會敗壞个生命；這種人，上帝會用永遠个生命賜給佢等。
8 總係，該兜自私个人，佢等拒絕真理去跈不義，上帝个發譴㧯責罰一定會臨到佢等。
9 所有作惡个人會堵到患難㧯痛苦，先係猶太人，然後係外邦人。
10 總係，所有行善个人，佢會賜佢等尊貴、榮光㧯平安，先係猶太人，然後係外邦人。
11 因為，無論對麼人，上帝毋會偏心。
12 外邦人無摩西个法律，佢等犯罪就會在這法律之外滅亡；猶太人有這法律，佢等犯罪就愛照這法律來受審判。
13 因為被上帝判無罪个，毋係該兜聽到法律个人，係該兜實行法律个人。
14 外邦人雖然無這個法律，總係，佢等若係照天性去行合這法律个事，佢等還係有自家个法律。
15 佢等个表現顯明這法律个命令係寫在佢等个心肚；佢等个良心就係證明這個事實；因為，佢等个心有時會責備自家，有時會為自家辯護。
16 照𠊎所傳个福音，在末日，上帝通過基督耶穌審判个時，就係愛照恁樣來審判人心中一切个祕密。
17 總係，你講你係猶太人，你倚靠法律，又誇口同上帝有特別个關係。
18 你已經接受法律个教訓，知上帝愛你做麼介，也曉得分別是非。
19 你深信自家係為瞙目个帶路个人，係該兜在烏暗中个人个光，
20 係戇仔个指導者，係後生人个先生。你又認為，因為你有摩西个法律，就對智識㧯真理有把扼。
21 你教別人，樣般毋教自家呢？你教訓人做毋得偷拿，自家卻偷拿嗎？
22 你講做毋得犯姦淫，自家卻去犯嗎？你惱偶像，自家卻偷拿宮廟肚个東西嗎？
23 你誇口你有上帝个法律，自家反轉破壞上帝个法律來侮辱佢嗎？
24 聖經講：「為到你等个緣故，上帝个名被外邦人侮辱。」
25 你若係遵行法律，你个割禮就有價值；你若違犯法律，你个割禮就無半些路用。
26 恁樣看來，一個無受割禮个人若遵行法律个命令，上帝敢毋會算佢做受割禮个人嗎？
27 你等猶太人會被外邦人定罪！因為你等領受法律條文，又接受割禮，總係你等違犯法律；佢等个身體雖然無受割禮，總係佢等遵行法律。
28 其實，麼人正算係真个猶太人，正經受割禮个人呢？毋係外表做猶太人、身體接受割禮个。
29 總講，內肚做猶太人个，正係真个猶太人；共樣，毋係因為法律條文，係通過聖靈个工作，心肝接受割禮个，正係真个割禮。這種人所得到个稱讚，毋係對人，係對上帝來个。