Psalms 89
1 上主啊，𠊎愛永遠歌唱你不變个慈愛；𠊎愛開嘴傳揚你个信實直到萬代。
2 𠊎講，你个慈愛永遠長存；你个信實堅定，像天一樣。
3 你講：「𠊎識同𠊎所揀選个人立約；𠊎識應許𠊎个僕人大衛講：
4 『𠊎愛使你个後代永遠做王；𠊎愛堅固你个王位到萬代。』」
5 上主啊，諸天頌讚你奇妙个作為；聖者在天庭唱歌讚美你个信實。
6 天頂敢有同上主比抑得个？神个眾子當中無一個做得同上主擺共下。
7 在聖者个聚會中，上帝最受尊重；佢等在佢个周圍，全部敬畏佢。
8 主上帝—萬軍个元帥啊，麼人像你恁有權能？上主啊，你在所有个事情上顯出你个信實。
9 你管制大海；你平靜波浪。
10 你打碎海怪拉哈伯，㓾死牠；你用大權能个手打散你个仇敵。
11 天係你个，地也共樣係你个；世界㧯其中个萬物係你創造个。
12 對南極到北極，全部係你造个；他泊山、黑門嶺攏總對你歡呼。
13 你个手骨樣般有力！你个權能樣般強大！
14 你个國係用正義㧯公當做根基；你所做个一切顯出慈愛㧯信實。
15 用詩歌敬拜你个人實在有福氣！上主啊，佢等生活在你个光明中。
16 因為你，佢等歸日歡喜快樂；佢等所頌讚个係你个公義。
17 你係佢等个榮光㧯力量；你施恩，𠊎等就得到勝利。
18 𠊎等个盾牌實在係上主揀選个；𠊎等个王係以色列个聖者設立个。
19 該時，你在異象中對你忠心个子民講：「𠊎已經將冕旒賜給一個出名个勇士；𠊎將王位賜給𠊎對人民中選出來个人。
20 𠊎已經揀選𠊎个僕人大衛，用聖油膏佢，立佢做你等个王。
21 𠊎个能力愛時常同佢共下；𠊎个權能會使佢變盡強壯。
22 佢个仇敵永遠無辦法贏佢；邪惡个人也無法度害到佢。
23 𠊎愛打碎同佢作對个人；𠊎愛打橫一切恨佢个人。
24 𠊎愛用信實㧯慈愛款待佢；靠𠊎个名，佢就會得到勝利。
25 𠊎愛使佢个國土緊來緊大，對地中海到幼發拉底河。
26 佢會對𠊎講：『你係吾爸，𠊎个上帝；你係拯救𠊎个磐石！』
27 𠊎愛設立佢做長子，做世間最偉大个王。
28 𠊎對佢个慈愛毋會改變；𠊎同佢立个約永遠有效。
29 𠊎愛使佢个後代永遠掌權；佢个寶座會像天恁樣長存。
30 「佢个後代若棄絕𠊎个教示，行事為人毋遵照𠊎个法則，
31 佢等若違悖𠊎个規則，佢等若毋守𠊎个誡命，
32 𠊎就愛用棍仔來責罰佢等个過犯；𠊎也愛用鞭仔來責罰佢等个罪孽。
33 總係，𠊎對大衛个慈愛毋會收回；𠊎對佢个信實永遠毋會變質。
34 𠊎毋會廢掉同佢所立个約，也毋會改變𠊎給佢个應許。
35 「𠊎指自家个聖名發誓，𠊎發誓一擺永遠有效：𠊎絕對毋會欺騙大衛！
36 佢个後代會一代傳一代，直到永遠；𠊎愛看顧佢个寶座，使它像日頭長存。
37 佢个寶座會像月光恁堅定；月光係天空忠實个見證者。」
38 結果你卻拒絕佢，放掉佢；你非常譴你所選立个王。
39 你取消同你僕人所立个約；你將佢个冕旒㧒落湳泥肚。
40 你拆掉佢所有个城牆，使佢个城堡成做荒地。
41 過路个人全部搶佢；鄰國也相爭侮辱佢。
42 你使佢个仇敵攏總打贏佢；你使佢个敵人全部真歡喜。
43 你使佢个武器失效，使佢在戰場企毋住。
44 你搶走佢个權杖，將佢个寶座㩳橫。
45 你使佢未老先衰；你使佢受盡一切个羞辱。
46 上主啊，你囥等毋搭𠊎等，愛到永遠嗎？你个怒氣像火當𤏸，愛到幾時呢？
47 求你愛記得𠊎个人生係幾短；你所創造个人類係樣般虛空！
48 㖠有人長生不老呢？麼人逃得過陰間个權勢呢？
49 主啊，你用信實向大衛所應許个，你先前个慈愛在㖠位？
50 主啊，求你毋好毋記得你个僕人所承受个羞辱；求你毋好毋記得𠊎樣般忍受外邦个欺負。
51 上主啊，你个仇敵侮辱你設立个王；無論佢去到㖠位，佢等總係侮辱佢。
52 願上主永遠得到頌讚！阿愐！阿愐！