Bible

1 上帝啊，外族人侵入你个土地。佢等打垃圾你个聖殿，使耶路撒冷變做荒涼。 2 佢等拿你僕人个身屍給鷹鳥食；佢等將你聖民个身屍㧒給野獸。 3 佢等使你个子民血流成河，血像水恁樣淹等耶路撒冷，無留下一個人好埋葬屍體。 4 鄰國侮辱𠊎等；周圍个人笑𠊎等，嘲謔𠊎等。 5 上主啊，還愛幾久呢？你愛發譴到永遠嗎？你个怒氣愛像火燒到幾時呢？ 6 求你將怒氣轉向毋敬畏你个國家，拚在該兜毋求喊你名个人民身上； 7 因為佢等吞滅雅各个後代，使佢等个鄉土變做荒涼。 8 求你莫記等𠊎等祖先个罪，毋好對𠊎等討佢等个罪債。求你遽遽施恩來憐憫𠊎等，因為𠊎等已經無半些希望。 9 拯救𠊎等个上帝啊，求你為到你榮光个名來幫助𠊎等；求你為到你个名透放𠊎等，赦免𠊎等个罪。 10 做麼介俾列國緊問：「你等个上帝在㖠位哪？」俾𠊎等看到你責罰列國，因為佢等流你僕人个血。 11 被人捉去關个，願你垂聽佢等个噌聲；被人定死罪个，願你用大能透放佢等。 12 主啊，鄰國樣般羞辱你，求你用七倍還給佢等。 13 恁樣，𠊎這兜做你个子民、你牧養个羊群，𠊎等愛永遠感謝你；𠊎等愛頌讚你，直到世世代代！