Bible

Psalms 77

Chinese (T) - TNV2012

1 𠊎對上帝出聲求喊；𠊎大聲求上帝，求佢垂聽。

2 患難个時，𠊎尋求主；𠊎歸暗晡擎手祈禱，𠊎个心毋肯受人个安慰。

3 𠊎思念上帝就緊歎息；𠊎恬恬緊想就緊傷心。

4 你使𠊎歸暗晡睡毋落覺；𠊎憂愁操煩到講毋出話。

5 𠊎想念過去个日仔，想起先前該兜年日。

6 𠊎透夜緊想；𠊎心肝緊問：

7 「敢講主愛永遠㧒掉𠊎等？佢永遠無愛再施恩係麼？

8 佢不變个慈愛就永遠停掉嗎？佢个應許就萬代落空係麼？

9 敢講上帝已經毋記得樣般施恩？敢講佢个憐憫被怒氣塞掉係麼？」

10 𠊎就講：「這係𠊎最傷心个事情，至高者个右手已經無共樣了。」

11 上主啊，𠊎愛想念你偉大个作為；𠊎愛想起你往時所成就个奇事。

12 𠊎愛愐想你一切个所做；𠊎愛緊唸你大能个作為。

13 上帝啊，你所做个一切係聖潔个；其他个神明，㖠一個同你比抑得！

14 你係行神蹟奇事个上帝；你向列國顯出你个大能。

15 你用大力救贖你个子民，拯救雅各㧯約瑟个後代。

16 上帝啊，海水看到你就著驚；深淵見到你，共樣也緊掣。

17 烏雲降下大雨；天空緊響雷公；𥍉爧射來射去。

18 你个雷公𠾐𠾐滾；𥍉爧照光全世界；大地驚到緊顫緊掣。

19 你行過大海，你越過深淵，總係無人看到你个腳跡。

20 你識通過摩西㧯亞倫个手，像牧者恁樣帶領你个子民。