Psalms 73
1 上帝確實恩待以色列，好款待心肝淨浰个人。
2 總係𠊎險險打盪溜，𠊎个腳險險企毋在；
3 因為𠊎嫉妒驕傲个人興旺，看到壞人富貴𠊎盡毋甘願。
4 佢等無堵到麼介痛苦；佢等个身體也盡勇健。
5 佢等毋使像別人恁辛苦；佢等無像別人堵到災難。
6 所以，佢等就將驕傲準脖鍊戴；佢等也將暴力準衫褲著。
7 佢等个目珠顯出貪心；佢等个意念充滿詭詐。
8 佢等嘲謔別人，講人个壞話；佢等自高自大，圖謀壓制人。
9 佢等用嘴褻瀆上天，用舌乸教唆世間人；
10 致到連上帝个子民也跈佢等，一心一意信從佢等所講个話。
11 佢等講：「上帝樣會知？至高者敢有智識嗎？」
12 看啊，壞人就係恁樣；佢等當好彩，緊來緊發。
13 𠊎堅持純潔，毋敢犯罪；這實在係浪費精神个！
14 因為𠊎歸日堵到災難；逐日朝晨就受到責罰！
15 𠊎若係講：「𠊎愛繼續恁樣講」，𠊎就毋係你忠實个子民。
16 𠊎盡想愛了解這個事，總係𠊎傷腦筋也無用；
17 直到𠊎進入上帝个聖殿，𠊎正明白壞人个結局。
18 你實在將佢等放在滑溜溜个所在；你使佢等橫落滅亡之中。
19 佢等會在𥍉目之間滅掉；佢等會被大災難掃淨淨。
20 像人發夢，一醒過來，夢就無掉去，主啊，你一醒，佢等就無蹤無跡了。
21 𠊎本來心懷不平，𠊎个心肝受傷害。
22 𠊎像禽獸恁戇；𠊎對你無了解。
23 總係，𠊎一直同你共下，因為你牽等𠊎个右手。
24 你係用勸話來輔導𠊎，到尾你也會帶𠊎入榮光。
25 除了你，在天頂𠊎還有麼人？𠊎有你，在世間𠊎無再有好欣慕个。
26 𠊎个肉體㧯心神緊來緊腐敗；總係上帝就係𠊎心內个力量，又係𠊎个福份直到永永遠遠。
27 該兜離開你个人一定會滅亡；所有背叛你个人會被你消滅。
28 論到𠊎，親近上帝就係𠊎个福氣！𠊎靠至高个上主做𠊎个避難所；𠊎愛恁樣來宣揚你一切个作為。