Bible

1 上主—𠊎个上帝啊，你係𠊎避難个所在；求你救𠊎脫離該兜追𠊎个人，搶救𠊎。 2 若無，佢等會像獅仔恁樣將𠊎扯裂，將𠊎扯到碎碎，該時就無人能救𠊎。 3 上主—𠊎个上帝啊，論到做人，𠊎若係不義，雙手染到罪惡， 4 壞款待對𠊎有恩情个朋友，同𠊎作對个，𠊎佻佻欺負佢， 5 恁樣，就由在對敵追𠊎，捉𠊎；由在佢將𠊎踏死在地上，使𠊎个尊榮埋在泥灰肚。 6 上主啊，求你在發譴中䟘起來，企起來阻擋該兜敵人對𠊎个大發譴。好醒了，來幫助𠊎！求你施行正義！ 7 願萬民攏總圍等你；願你在高位掌權統治佢等。 8 上主審判萬民；上主啊，求你照𠊎个公義、㧯𠊎心中个純正審判𠊎。 9 公義个上帝，察驗人心㧯意念个啊！壞人作惡，求你即時阻止；義人行善，求你使佢等企穩。 10 上帝係保護𠊎个盾牌；佢拯救心肝正直个人。 11 上帝係公義个審判者；佢逐日責罰作惡个人。 12 人若係毋肯悔改，佢就磨利佢个劍；佢就拉弓準備好勢， 13 準備好致命个武器，點𤏸佢所愛射个火箭。 14 看啊，壞人樣般圖謀邪惡，佢心懷惡毒，行事奸詐。 15 佢挖陷阱愛害別人，自家反轉跌落去！ 16 佢个惡毒會轉頭害到佢自家；佢个強暴會落在自家个頭頂。 17 𠊎愛因為上主个公義感謝佢；𠊎愛歌頌上主—至高者个名！