Psalms 69
1 上帝啊，求你拯救𠊎！水浸到𠊎个頸筋囉！
2 𠊎陷在湳仔底背，無踏腳个地方；𠊎落在深水中，大水會浸死𠊎囉！
3 𠊎喊救命，喊到無力，喉嗹燥燥；𠊎仰望𠊎个上帝到目珠花花。
4 無緣無故怨恨𠊎个人比𠊎个頭那毛較多；無因無端對敵𠊎、愛消滅𠊎个人實在真強。佢等樣做得喊𠊎交出𠊎無偷無搶个東西？
5 上帝啊，你知𠊎个戇直；𠊎个罪過也瞞你毋過。
6 至高个上主—萬軍个元帥啊，莫俾仰望你个人因為𠊎見笑。以色列个上帝啊，莫俾尋你个人因為𠊎受侮辱。
7 𠊎就係為到你被人辱罵，滿面見笑。
8 𠊎該兜兄弟看𠊎做生份人；連𠊎个親兄弟也看𠊎做外人。
9 𠊎為你个聖殿大發熱心，就像火燒；別人對你个辱罵全部落在𠊎个身上。
10 𠊎禁食來刻苦自家，佢等卻反轉侮辱𠊎。
11 𠊎著麻衫表示哀傷，佢等就嘲謔𠊎。
12 佢等在街頭巷尾談論𠊎，連酒醉个也捉𠊎準歌唱。
13 總係𠊎，上主啊，𠊎愛求喊你；上帝啊，因為你豐盛个慈愛，因為你真實个救恩，求你允准𠊎个祈禱。
14 求你救𠊎脫出湳泥，莫俾𠊎沈下去；求你救𠊎離開深水，脫離怨恨𠊎个。
15 求你莫俾大水淹死𠊎，也毋好俾深潭吞滅𠊎，還有，莫俾墳墓埋到𠊎。
16 上主啊，求你應𠊎，因為你个慈愛係最好；求你照你豐盛个慈悲轉面過來、看顧𠊎。
17 求你莫揞等面毋搭你个僕人；𠊎在急難中，求你遽遽回答𠊎。
18 求你行近來救𠊎个性命；求你對仇敵手中救贖𠊎。
19 你知𠊎被人罵、被人欺負、受侮辱；𠊎个仇敵係㖠兜人，你全部清楚。
20 辱罵使𠊎非常傷心，又絕望。𠊎希望有人會同情，總係無；𠊎希望得到安慰，也得毋到。
21 𠊎肚飢，佢等給𠊎苦膽食；𠊎嘴燥，佢等給𠊎酸醋啉。
22 願佢等个筵席成做佢等个羅網；願佢等个慶祝變做佢等个陷阱。
23 願佢等目珠青盲、看毋到；願佢等腰骨痠痛到緊掣。
24 願你對佢等大發譴；願你个責罰逐到佢等。
25 願佢等个營房荒涼掉；願佢等个布篷無人住。
26 佢等壓迫你所責罰个人；佢等嘲謔你所打傷个人。
27 求你嚴嚴責罰佢等个罪，莫俾佢等承受你个拯救。
28 願佢等个名對生命冊拭掉；願佢等無在義人个名單中。
29 𠊎還在憂傷㧯困苦之中；上帝啊，求你保護𠊎，救𠊎！
30 𠊎愛用詩歌來讚美上帝个名；𠊎愛用感謝來宣揚佢个偉大。
31 這件事比獻牛，抑係獻有角有蹄个牛牯，使上主還較歡喜。
32 受壓迫个人看到就快樂；尋求上帝个人，願你等个心得到鼓勵。
33 因為上主留心聽困苦人个祈禱；佢毋會毋搭監獄肚佢个子民。
34 願天㧯地攏總讚美上帝！海㧯其中个生物讚美佢！
35 上帝愛拯救錫安，重建猶大該兜城；佢个子民愛住在該位，承接做家業。
36 佢僕人个後代愛承接該地；敬愛佢名个人會住在該位。