Psalms 68
1 願上帝䟘起來，使佢个仇敵四散；願該兜怨恨佢个對佢面前逃走。
2 願佢等被上帝逐走，就像煙被風吹散一樣；願壞人在上帝面前消滅，像蠟堵到火就溶掉一樣。
3 總係義人愛歡喜唱歌，在上帝面前歡喜快樂。
4 愛對上帝唱詩，頌讚佢个名；愛為到該坐雲个預備道路。佢个名係安到上主；你等愛在佢面前歡喜快樂！
5 上帝住在佢个聖殿肚；佢做孤兒个阿爸，為寡婦伸冤。
6 上帝使孤單个人有屋下好轉，使被人關个得到自由快樂；總係悖逆个住在燥熻个地。
7 上帝啊，你在你子民个頭前行，你帶領佢等行過曠野个時節，
8 大地震動，天也落雨，因為西奈个上帝出現，以色列个上帝降臨了。
9 上帝啊，你降下大雨；你使燥燥个土地得到滋潤。
10 你个子民就住在該位；上帝啊，你用慈悲款待窮苦人。
11 主一下令，歸群个婦女就傳講：
12 「該兜王㧯軍隊逃走了！」在屋下个婦女分到戰利品；
13 有包白銀个月鴿仔个雕像，牠兜个翼胛有黃金緊閃光。(戰爭中樣有人囥在羊圈肚？)
14 全能个上帝逐散該兜王个時，佢喊大雪落在撒們山頂高。
15 巴珊个山實在真莊嚴；巴珊山有盡多座山峰。
16 你等多峰多嶺个山啊，做麼介嫉妒上帝所選所住个錫安山？上主愛永遠住在錫安山頂！
17 上帝个戰車有千千萬萬；主帶它兜對西奈入聖所。
18 佢升上去到高高个所在，帶等盡多捉來个人；佢接受人獻个禮物，甚至悖逆者个禮物。主上帝愛住在該所在。
19 愛頌讚主，就係救𠊎等个上帝，因為佢逐日揹等𠊎等个重擔。
20 𠊎等个上帝係拯救个上帝；上主係救𠊎等脫離死亡个主。
21 上帝一定愛打爛佢仇敵个頭那，該兜硬硬愛犯罪个人个頭那殼。
22 主講過：「𠊎愛將你等个仇敵對巴珊帶來；𠊎愛帶佢等對深海个當中過來，
23 好俾你等對佢等个血中行等過，也好俾你等个狗來舐佢等个血。」
24 上帝啊，大家攏總看到你得勝个行列；佢等看等𠊎个上帝—𠊎个王進入聖所。
25 詩班在前，樂隊在後，打鈴鼓个童女在中央。
26 你等愛在大聚會中頌讚上帝；以色列个子孫啊，你等愛頌讚上主！
27 最細个支族便雅憫行最頭前，然後，猶大个眾領袖㧯隨從跈等，接等係西布倫㧯拿弗他利个眾領袖。
28 上帝啊，求你顯出你个大能，就係你為到𠊎等用過个能力！
29 因為你在耶路撒冷个聖殿，列王愛帶禮物獻給你。
30 求你責罰埃及—該隻蘆竹中个禽獸；責罰列國—該群牛牯㧯牠兜个細牛，直到佢等低頭降服，對你獻上銀仔。求你將該兜盡好相㓾个民族打散！
31 會有大使對埃及前來；古實人會擎手獻禮物給上帝。
32 地上萬國啊，愛歌頌上帝；你等愛唱詩歌來頌讚主！
33 愛歌頌該坐在萬古高天上个主！聽啊，佢發出个聲音滿有權能。
34 愛傳揚上帝个大權能；佢个威嚴大過以色列；佢个大權能充滿穹蒼。
35 上帝啊，你在你个聖所中係真得人敬畏个！以色列个上帝賜力量㧯權能給佢个子民。你等愛頌讚上帝！