Bible

1 上主啊，求你毋好發譴來責備𠊎；也毋好在大發譴之中來責罰𠊎！ 2 上主啊，求你憐憫𠊎，因為𠊎个身體非常軟弱；上主啊，求你醫治𠊎，因為𠊎个骨頭驚到緊顫。 3 𠊎个身心也盡著驚；上主啊，愛繼續到幾時呢？ 4 上主啊，求你回心轉意來救𠊎！因為你不變个慈愛，求你拯救𠊎！ 5 過身个人無可能紀念你！敢有麼人在陰間頌讚你？ 6 𠊎緊噌，噌到無半滴力；逐暗晡，𠊎个目汁像做大水，淹到歸眠床，被骨也濕𣽛𣽛。 7 𠊎傷心噭到無目汁、目珠腫腫；該兜對敵害𠊎眼目昏花。 8 你這兜作惡个人啊，閃走！因為上主聽到𠊎个噭聲了。 9 上主已經聽到𠊎个懇求；上主定著接受𠊎个祈禱。 10 𠊎个對敵全部會盡見笑，非常著驚；佢等會忽然間受盡侮辱，走到淨淨。