Bible

1 𠊎个心有盡靚个話衝等出來，為到王吟唱美妙个詩歌；𠊎个舌乸就像作家流利个筆。 2 在萬人中，你第一斯文；你个講話也滿有恩惠；上帝就永遠賜福給你！ 3 偉大个王啊，願你腰間佩劍！願你顯出你个尊榮㧯威嚴！ 4 為到維護真理㧯正義，在威嚴中勇敢向前！你个右手愛做出得人驚个事。 5 你个箭又尖又利，射入敵人个心；萬邦全部降服在你个腳前。 6 上帝賜你个寶座永遠長存；正直係你治理國家个根據。 7 你歡喜公義，怨恨邪惡；所以上帝—就係你个上帝選立你，使你充滿喜樂，贏過同伴。 8 你个衫發出沒藥、沉香㧯肉桂个香味；象牙宮肚傳出弦琴个音樂，使你歡喜。 9 你个嬪妃中有好多係列國个公主；王后帶等純金个裝飾企在你右片。 10 王个新娘啊，愛聽，愛想，愛恬恬聽：毋好懷念你个本族㧯你个親戚！ 11 恁樣，你个美貌正會使王戀慕你；因為佢係你个主人，你愛順服佢！ 12 泰爾个人會帶等禮物來見你；有錢人會想愛得到你个歡喜。 13 在宮中，公主著到非常靚！姖所著个衫係用金線繡个。 14 姖披上禮服，被人帶到王个面前；女儐相㧯使女也跈等去你該位。 15 姖等全部歡喜快樂，共下入去王个宮殿。 16 王啊，你將來會有當多子孫承接列祖个王位；你會使佢等統治全地。 17 𠊎个詩會使你个名聲傳到萬代；萬民會一直稱頌你到永永遠遠。