Bible

1 罪在壞人个心底緊講；在佢看來，毋使驚上帝。 2 罪人自高自大，恅到上帝毋會發覺、毋會責罰佢个罪。 3 佢滿嘴係邪惡㧯詭詐；佢早就無智慧，無行善。 4 佢上床後還係圖謀壞事，所愛行个全部毋係好事；佢從來毋識拒絕罪惡。 5 上主啊，你不變个慈愛高到堵天；你个信實達到穹蒼。 6 你个公義像高山穩固；你个判斷像深淵難測。無論係人抑係頭牲，上主啊，你全部看顧！ 7 上帝啊，你不變个慈愛實在寶貴！世間人在你个翼胛下尋到庇佑。 8 佢等在你个屋下享受筵席；你給佢等啉你快樂个泉水。 9 你就係一切生命个源頭；在你个光中，𠊎等看到光。 10 求你一直痛惜認識你个人；求你繼續給正直个人公道。 11 莫俾驕傲个人蹧踏到𠊎；莫俾邪惡个人將𠊎逐走。 12 你看，作惡个人橫落去了；已經㩳橫了，䟘毋起來了！