Bible

1 上主係𠊎个光，𠊎个拯救；𠊎還愛驚麼人？上主係𠊎生命个保護者；𠊎有麼介好驚啊？ 2 壞人，就係𠊎个仇敵，攻擊𠊎，想愛害死𠊎个時節，自家反轉跌倒橫落去。 3 就係有千軍萬馬圍困𠊎，𠊎个心也毋驚；就算發動戰爭攻擊𠊎，𠊎還係靠主安穩自在。 4 𠊎對上主求一項事，只有這項事係𠊎个願望：就係一生人住在上主个屋下，仰望上主个榮光、美善，在聖殿底背尋求佢个帶領。 5 在患難个時節，佢會保佑𠊎，將𠊎安安全全囥在佢个聖帳篷肚，俾𠊎穩穩當當高高企在磐石面頂。 6 恁樣，𠊎一定會得勝，贏過𠊎周圍个仇敵。𠊎愛在佢个聖帳篷歡歡喜喜來獻祭；𠊎愛唱歌讚美上主！ 7 上主啊，求你聽𠊎个祈求！求你憐憫𠊎，應𠊎！ 8 你識對𠊎講：「愛仰望𠊎！」上主啊，你就係𠊎所仰望个！ 9 這下，求你毋好揞等面毋搭𠊎！求你毋好發譴逐你个僕人走！你一直係𠊎个幫助。拯救𠊎个上帝啊，求你毋好離開𠊎，毋好放掉𠊎！ 10 就算𠊎个爺𡟓放掉𠊎，上主還愛照顧𠊎。 11 上主啊，求你指示𠊎應當行个路；因為有盡多敵人想愛害𠊎，求你帶𠊎行平安个路。 12 敵人做假見證害𠊎，恐嚇𠊎；求你毋好俾𠊎落在佢等个手中。 13 𠊎確信，在有生之日，𠊎會看到上主賞賜个恩惠。 14 愛仰望上主！愛剛強壯膽！愛仰望上主！